بٷگٸن استاناداعى بەيبٸتشٸلٸك جەنە كەلٸسٸم سارايىندا «قازاقستان» تەلەراديوكورپوراتسيياسىنىڭ ۇيىمداستىرۋىمەن «سامعا, Balapan!» بالالار فەستيۆالٸ ٶتتٸ.
شاراعا مەجٸلٸس جەنە سەنات دەپۋتاتتارى, جۋرناليستەر مەن رەسپۋبليكالىق بالالار ۇيىمدارىنىڭ ٶكٸلدەرٸ قاتىستى.
حالىقارالىق بالالاردى قورعاۋ كٷنٸنە وراي دەستٷرلٸ تٷردە ٶتەتٸن ٸس-شارانىڭ بيىلعى ەرەكشەلٸگٸ - ٶز زامانداستارى اراسىندا ٸزگٸ ەرەكەتتەرٸمەن, باتىلدىعىمەن, ەڭبەكقورلىعىمەن, بٸلٸم مەن عىلىمعا, ٶنەرگە قۇشتارلىعىمەن دارالانعان بالالارعا «سامعا, Balapan!» جٷلدەسٸ تابىستالدى. بۇل - «Balapan» تەلەارناسىنىڭ رەداكتسييالىق القاسىنىڭ شەشٸمٸمەن بەرٸلەتٸن ارنايى ماراپات.
فەستيۆالدٸڭ «بالا باتىر» نوميناتسيياسى 2022 جىلعى 3 جەلتوقسان كٷنٸ اتىراۋ قالاسىنداعى جايىق ٶزەنٸنٸڭ جاعاسىندا دوستارىن سۋدان امان الىپ قالعان دٸنمۇحاممەد جاڭبىربايعا, «سپورتشى بالاپان» نوميناتسيياسى 9 جاسقا دەيٸنگٸ بالالار اراسىندا شاحماتتان ەلەم چەمپيونى, G09 بويىنشا FIDE رەيتينگٸنٸڭ باسىندا تۇرعان الاننا بەرٸكقىزىنا, «ٶنەرتاپقىش بالا» اتالىمى روبوتوتەحنيكا بويىنشا حالىقارالىق بايقاۋلاردىڭ جەڭٸمپازى, الماتىلىق 13 جاستاعى دياس مۇراتوۆقا, «قامقور بالا» نوميناتسيياسى اقمولا وبلىسى اتباسار اۋدانىنىڭ 10 جاستاعى تۇرعىنى, رەسپۋبليكا بويىنشا ەڭ جاس ەرٸكتٸ كسەنييا پەليح پەن قارييالارعا كٶمەك قولىن سوزىپ جٷرگەن استانا قالاسىنداعى №15 مەكتەپ-ليتسەيدٸڭ 8-سىنىپ وقۋشىسى ەمينا تەمٸرحانوۆاعا تابىستالدى.
«سامعا, Balapan!» جٷلدەسٸنٸڭ «مەنٸڭ سٷيكٸمدٸ كەيٸپكەرٸم» ارنايى نوميناتسيياسىن كٶرەرمەن كٶزايىمىنا اينالعان «جٸبەك» انيماتسييالىق مۋلتسەريالىنىڭ باستى كەيٸپكەرٸ يەلەندٸ. جەڭٸمپاز «Balapan» تەلەارناسىنىڭ ۆەب-رەسۋرستارى ارقىلى كٶرەرمەندەر اراسىندا جٷرگٸزٸلگەن ساۋالناما نەتيجەسٸندە انىقتالدى.
«نومينانتتاردى ٸرٸكتەۋگە قر وقۋ-اعارتۋ مينيسترلٸگٸ, قر مەدەنيەت جەنە سپورت مينيسترلٸگٸ مەن «ۇلتتىق ۆولونتەرلەر جەلٸسٸ» بٸرلەستٸگٸ اتسالىستى. «سامعا, Balapan!» فەستيۆالٸ بولاشاقتا بالالاردى يگٸ ٸستەرگە شاقىراتىن بٸرەگەي الاڭعا اينالادى. قوعامدى ٸزگٸلەندٸرۋ, ونىڭ نەگٸزگٸ مٷشەسٸ بالالاردى ىنتالاندىرۋ, ينكليۋزيۆتٸ مەدەنيەت قالىپتاستىرۋ «Balapan» ارناسىنىڭ باستى ەلەۋمەتتٸك مٸندەتتەرٸنٸڭ بٸرٸ», - دەدٸ تەلەراديوكورپوراتسييانىڭ باسقارما تٶرايىمى لەززات تانىسباي.
شارانىڭ تەلەۆيزييالىق نۇسقاسى «Balapan» تەلەارناسىنان 1 ماۋسىم كٷنٸ ساعات 13:30-دا كٶرسەتٸلەدٸ.
