استانادا پوليتسييا الاياقتىق سحەمالارعا قاتىسى بار 20 جاستاعى دروپپەردٸ ۇستادى, دەپ حابارلايدى ult.kz.
Polisia.kz مەلٸمەتٸنشە, جاس جٸگٸت قىلمىس ۇيىمداستىرۋشىلاردىڭ نۇسقاۋى بويىنشا جەبٸرلەنۋشٸلەردەن الىنعان اقشانى الىپ, كريپتوۆاليۋتاعا ايىرباستاپ, كٶرسەتٸلگەن كريپتوەميياندارعا اۋدارىپ وتىرعان. ول بۇل ەرەكەتٸ ٷشٸن اقشالاي سىياقى العان.
كٷدٸكتٸنٸڭ الاياقتىقتىڭ ەكٸ دەرەگٸنە قاتىسى بارى انىقتالدى. بٸرٸنشٸ جاعدايدا قىلمىسكەرلەر ٶزدەرٸن قۇقىق قورعاۋ ورگاندارىنىڭ قىزمەتكەرلەرٸ رەتٸندە تانىستىرىپ, ازاماتتى 7 ميلليون تەڭگەسٸن بەرۋگە كٶندٸرگەن. ەر ادام اقشانى بانكتەگٸ دەپوزيتٸنەن شەشٸپ الىپ, كۋرەر ارقىلى قولما-قول تاپسىرعان.
ەكٸنشٸ جەبٸرلەنۋشٸ 22 ميلليون تەڭگەسٸنەن ايىرىلعان. الاياقتار ٶزدەرٸن بانك قاۋٸپسٸزدٸك قىزمەتٸنٸڭ ماماندارى رەتٸندە تانىستىرىپ, اقشاسىن بەرۋگە كٶندٸرگەن. قاراجاتتىڭ بٸر بٶلٸگٸ قولما-قول بەرٸلٸپ, قالعانى بانك شوتىنا اۋدارىلعان.
وسىلايشا, ەكٸ ەپيزود بويىنشا جەبٸرلەنۋشٸلەردەن الىنعان قاراجاتتىڭ جالپى سوماسى 29 ميلليون تەڭگەنٸ قۇرادى.
اتالعان فاكتٸلەر بويىنشا قىلمىستىق ٸس قوزعالىپ, كٷدٸكتٸ ۋاقىتشا ۇستاۋ يزولياتورىنا قامالدى. قازٸر قىلمىسقا قاتىسى بار ٶزگە تۇلعالار انىقتالىپ جاتىر.
پوليتسييا مەلٸمەتٸنشە, جىل باسىنان بەرٸ ينتەرنەت-الاياقتىقتان زارداپ شەككەن ەلوردا تۇرعىندارىنا 700 ميلليون تەڭگەدەن استام قاراجات قايتارىلعان.
