Astanada politsiia alaiaqtyq shemalarǵa qatysy bar 20 jastaǵy dropperdi ustady, dep habarlaidy ult.kz.
Polisia.kz málimetinshe, jas jigit qylmys uiymdastyrýshylardyń nusqaýy boiynsha jábirlenýshilerden alynǵan aqshany alyp, kriptovaliýtaǵa aiyrbastap, kórsetilgen kriptoámiiandarǵa aýdaryp otyrǵan. Ol bul áreketi úshin aqshalai syiaqy alǵan.
Kúdiktiniń alaiaqtyqtyń eki deregine qatysy bary anyqtaldy. Birinshi jaǵdaida qylmyskerler ózderin quqyq qorǵaý organdarynyń qyzmetkerleri retinde tanystyryp, azamatty 7 million teńgesin berýge kóndirgen. Er adam aqshany banktegi depozitinen sheship alyp, kýrer arqyly qolma-qol tapsyrǵan.
Ekinshi jábirlenýshi 22 million teńgesinen aiyrylǵan. Alaiaqtar ózderin bank qaýipsizdik qyzmetiniń mamandary retinde tanystyryp, aqshasyn berýge kóndirgen. Qarajattyń bir bóligi qolma-qol berilip, qalǵany bank shotyna aýdarylǵan.
Osylaisha, eki epizod boiynsha jábirlenýshilerden alynǵan qarajattyń jalpy somasy 29 million teńgeni qurady.
Atalǵan faktiler boiynsha qylmystyq is qozǵalyp, kúdikti ýaqytsha ustaý izoliatoryna qamaldy. Qazir qylmysqa qatysy bar ózge tulǵalar anyqtalyp jatyr.
Politsiia málimetinshe, jyl basynan beri internet-alaiaqtyqtan zardap shekken elorda turǵyndaryna 700 million teńgeden astam qarajat qaitarylǵan.
