فوتو: قر قما
قارجى مونيتورينگٸ اگەنتتٸگٸنٸڭ ماڭعىستاۋ وبلىسى بويىنشا دەپارتامەنتٸ «ٶزەن كٶلٸك قۇراستىرۋ زاۋىتى» جشس باسشىلىعىنا قاتىستى ٷلەسكەرلٸك قۇرىلىس اياسىندا ازاماتتاردىڭ قاراجاتىن زاڭسىز تارتۋ فاكتٸسٸ بويىنشا تەرگەۋدٸ اياقتادى, دەپ حابارلايدى Ult.kz.
رەسمي دەرەككە سەيكەس, كومپانييا باسشىلىعى ەكٸ جىل بويى جاڭاٶزەن قالاسىندا «Astana Rich Village» تۇرعىن ٷي كەشەنٸن قاجەتتٸ رۇقسات قۇجاتتارىنسىز, جوبالىق-سمەتالىق ماتەريالدارسىز, مەملەكەتتٸك ساراپتاما مەن اۆتورلىق قاداعالاۋسىز سالعان.
پەتەرلەردٸ نارىقتان تٶمەن باعامەن ساتۋ تۋرالى جارنامالار تٷرلٸ ينتەرنەت-رەسۋرستارعا جارييالانىپ, نەتيجەسٸندە 23 ازاماتپەن جالعان الدىن الا ساتىپ الۋ-ساتۋ شارتتارى جاسالعان. زاڭسىز تارتىلعان قاراجات كٶلەمٸ 303 ملن تەڭگەدەن اسقان.
تٷسكەن اقشا قۇرىلىس ماتەريالدارىن ساتىپ العانداي ەتٸپ رەسٸمدەلٸپ, كەسٸپورىن كاسساسى ارقىلى قولما-قول اقشاعا اينالدىرىلعان. تەرگەۋ بۇل قاراجاتتىڭ شىن مەنٸندە جەكە قاجەتتٸلٸكتەرگە جۇمسالعانىن انىقتادى. تۇرعىن ٷي قۇرىلىسى اياقتالماعان.
جەبٸرلەنۋشٸ ٷلەسكەرلەردٸڭ مٷددەلەرٸن قورعاۋ ماقساتىندا سوت سانكتسيياسىمەن كٷدٸكتٸلەرگە تيەسٸلٸ مٷلٸككە — تۇرعىن ٷي, پەتەر, ەكٸ اۆتوكٶلٸك جەنە ٷش جەر ۋچاسكەسٸنە — تىيىم سالىندى. كٷدٸكتٸلەردٸڭ بٸرٸ قاماۋعا الىندى, ەكٸنشٸسٸنە كەپٸل تٷرٸندەگٸ بۇلتارتپاۋ شاراسى قولدانىلدى.
قر قپك-نٸڭ 201-بابىنا سەيكەس ەزٸرگە ٶزگە اقپارات جارييا ەتۋگە جاتپايدى.
