ارىس قالاسىندا وبلىس ەكٸمٸنٸڭ تاپسىرماسىمەن كەسٸپكەرلەرگە ارنالعان «قامقور» باعدارلاماسى ٸسكە قوسىلدى, دەپ حابارلايدى "ۇلت اقپارات" وبلىس ەكٸمٸنٸڭ باسپاسٶز قىزمەتٸنە سٸلتەمە جاساپ.
5 ملن تەڭگەگە دەيٸن بەرٸلەتٸن 1%-دىق جەڭٸلدەتٸلگەن كەپٸلسٸز نەسيەنٸڭ ۋاقىتى - 4 جىل.
قازٸرگٸ تاڭدا ارىستاعى كەسٸپكەرلەردٸڭ مەسەلەسٸن شەشۋ ٷشٸن «اتامەكەن» كەسٸپكەرلەر پالاتاسىنان 25 قىزمەتكەر كەلٸپ, 17 سەكتورعا بٶلٸنٸپ, قىزمەت اتقارۋدا. ولار 10 كٷن بويى تٶتەنشە جاعداي سالدارىنان زارداپ شەككەن كەسٸپكەرلٸك نىساندارىن باعالاپ, تيٸستٸ سوماسىن ەسەپتەپ شىعادى.
جالپى, ارىس قالاسىندا 346 كەسٸپكەرلٸك نىسانى تٸركەلگەن. سونىڭ ٸشٸندە 258 نىسانعا جارىلىس كەزٸندە زاقىم كەلگەن. 253 نىسانعا جٶندەۋ جۇمىستارى جٷرگٸزٸلسە, 5 نىسان تولىقتاي قايتا سالىنادى. تيٸستٸ قاراجات بٶلٸنۋدە.
كەزدەسۋ بارىسىندا ٶزدەرٸنە قاجەتتٸ كەڭەس العان 2 كەسٸپكەرگە 10 ملن تەڭگە كرەديت بەرٸلەتٸن بولدى. سونداي-اق, كەسٸبٸن دٶڭگەلەتٸپ وتىرعاندار 2020 جىلدىڭ 1 قاڭتارىنا دەيٸن سالىقتان بوساتىلادى.
جەڭٸلدەتٸلگەن نەسيە بەرۋ ٷشٸن جەرگٸلٸكتٸ بيۋدجەتتەن 200 ملن تەڭگە قارجى بٶلٸنٸپ وتىر. «دامۋ» قورىنان قوسىمشا 300 ملن تەڭگە قاراستىرىلادى.
