الماتى قالاسىنىڭ مەملەكەتتٸك باس سانيتار دەرٸگەرٸ جانداربەك بەكشين ونلاين بريفينگ بارىسىندا "بالالارعا ۆاكتسينا قاشان سالىنادى" دەگەن سۇراققا جاۋاپ بەردٸ, دەپ حابارلايدى "ۇلت اقپارات".
ونىڭ ايتۋىنشا, ەلٸمٸزدە كوروناۆيرۋسقا قارسى سالىنىپ جاتقان ۆاكتسينانىڭ بارلىعى 18 جاستان اسقاندارعا ارنالعان.
«ەلٸمٸزدە كوروناۆيرۋسقا قارسى سالىنىپ جاتقان ۆاكتسينانىڭ بارلىعى 18 جاستان اسقاندارعا ارنالعان. «بالالارعا ۆاكتسينا سالىنادى ەكەن» دەگەن قاۋەسەت حالىقتى ٷرەيلەندٸرٸپ جاتىر. ۆاكتسينانىڭ بالالارعا سالىناتىنىن راستايتىن ەشقانداي رەسمي قۇجات جوق. سوندىقتان مۇنداي اڭىز اقپاراتتى تاراتۋدى دوعارۋ كەرەك. ونىڭ بارلىعى حالىقتى الاڭداتۋ ماقساتىندا جاسالىپ جاتىر دەپ ويلايمىن. ەلٸمٸزدە 18 جاسقا دەيٸنگٸ بالالارعا ۆاكتسينا سالۋ مەسەلەسٸ قارالماعان», - دەدٸ جانداربەك بەكشين.
ونىڭ ايتۋىنشا, جىل باسىنان بەرٸ بٸر جاسقا تولماعان 1180 نەرەستە كوروناۆيرۋس جۇقتىرعان.
«ال شٸلدە ايىنىڭ ەكٸ اپتاسىندا 185 نەرەستە اۋىرعان. ولارعا اتا-اناسىنان, ياعني وتباسىندا جۇعىپ جاتىر. بٸر جاسقا تولماعان نەرەستەلەر قاي جەرٸ اۋىرىپ تۇرعانىن ايتا المايدى. سوندىقتان ولاردى قورعاۋ كەرەك. ونىڭ ٷستٸنە 18 جاسقا تولماعان بالالار اراسىندا دا اۋرۋشاڭدىق ٶسٸپ بارادى. بىلتىر 280 وقۋشى اۋىرسا, بيىل 5 مىڭعا جەتتٸ. سوندىقتان قاۋٸپسٸزدٸك شارالارىن ۇستانۋىمىز كەرەك», - دەدٸ جانداربەك بەكشين.
