"انگولا: افريكاداعى بەيمەلٸم ميسسييا" اتتى دەرەكتٸ فيلم جارىق كٶردٸ

دەرەكتٸ فيلمدە 1975 جىلدارداعى انگولاداعى ازاماتتىق سوعىس تاريحى كەڭٸنەن باياندالىپ, وعان قاتىسقان قازاقستاندىق ساربازدار تۋرالى تىڭ اقپاراتتار ايتىلادى. ارنايى تاپسىرمامەن انگولا اسقان وتانداستارىمىزدىڭ قيلى تاعدىرى فيلم ٶزەگٸنە اينالادى. 

كەڭەس وداعى انگولاداعى ازاماتتىق سوعىسقا نەلٸكتەن ارالاستى? قانداي قولداۋ كٶرسەتتٸ? ەسكەريلەرگە قانداي مٸندەت جٷكتەلدٸ? دەرەكتٸ فيلم اۆتورلارى بۇل ساۋالداردىڭ جاۋابىن ٸزدەيدٸ. 

كەڭەس وپەراتسيياسىنىڭ بەيمەلٸم بەتتەرٸ, كاپيتاليزم مەن سوتسياليزمنٸڭ تەكەتٸرەسٸ ارنايى جوبادا تالقىعا سالىنادى.

انگولادا استىرتىن قىزمەت ەتكەن قازاقستاندىق ەسكەريلەر سۇحبات بەرٸپ, سول بٸر سۇراپىل جىلدارداعى باستان كەشكەن وقيعالارىن ەسكە الادى.

سەل شەگٸنٸس جاساساق. افريكانىڭ باتىسىن بويلاپ جاتقان انگولا مەملەكەتٸ 1975 جىلى 11 قاراشادا تەۋەلسٸزدٸگٸن جارييالاعان. ۇزاق جىلدار پورتۋگالييانىڭ وتارى بولعان ەلدٸڭ ەگەمەندٸك الۋى وڭايعا تٷسپەدٸ.

جەرگٸلٸكتٸ حالىق وتارشىلارىنىڭ ٷستەمدٸگٸنە قارسى ازاتتىق كٷرەسٸن ٷزدٸكسٸز جٷرگٸزگەن. ەسٸرەسە 1961 جىلى باستالعان ۇلت-ازاتتىق قوزعالىسى تەۋەلسٸزدٸك ٷشٸن جاسالعان بٸردەن-بٸر قادام بولدى. ەل پاتريوتتارى پورتۋگالييا باسقىنشىلارىنا قارسى قارۋلى كٷرەسكە شىعادى. بۇل كٷرەستٸڭ باسىندا انگولانى ازات ەتۋ جولىنداعى حالىقتىق قوزعالىس پارتيياسى تۇرادى.

دەل سول جىلى مامىر ايىندا كەڭەس ٷكٸمەتٸ "انگولاداعى جاعداي تۋرالى" ارنايى مەلٸمدەمە جاسايدى. ول مەلٸمدەمەدە پورتۋگالييا وتارشىلدارى ايىپتالىپ, بٷكٸل دٷنيەجٷزٸن انگولا حالقىنىڭ قۇقىن قورعاۋعا شاقىرادى. 

وسى كەزدەن باستاپ كەڭەس ٷكٸمەت تاراپى قول ۇشىن سوزا باستايدى. انگولا ساربازدارىن وقىتۋ ٷشٸن كومانديرلەر, نۇسقاۋشىلار مەن ٷيرەتۋشٸلەر جٸبەرٸلٸپ, قارۋ-جاراق تٷرٸندە كٶمەك كٶرسەتٸلەدٸ. انگولاعا اتتانعانداردىڭ ٸشٸندە قازاقستاندىق ەسكەريلەر دە از بولماعان.

بٷگٸنگە دەيٸن ەلٸمٸزدە "16 جىلعا سوزىلعان انگولا سوعىسىنا" قازاقستاندىقتاردىڭ قاتىسۋى تۋرالى اقپاراتتار اشىق ايتىلا بەرمەدٸ. 

بۇل دەرەكتٸ فيلم قارا قۇرلىقتاعى قۇپييا ميسسييا تۋرالى ايتىلماعان اقپاراتتاردى ەل نازارىنا ۇسىنىپ, ٶز مٸندەتٸن ابورويمەن اتقارعان ازاماتتارىمىزدىڭ جانكەشتٸ جىلدارىنان سىر شەرتەدٸ.