"Qazaqstan" ulttyq arnasynan "Angola: Afrikadaǵy beimálim missiia" atty derekti film kórermen nazaryna usynyldy.
Derekti filmde 1975 jyldardaǵy Angoladaǵy azamattyq soǵys tarihy keńinen baiandalyp, oǵan qatysqan qazaqstandyq sarbazdar týraly tyń aqparattar aitylady. Arnaiy tapsyrmamen Angola asqan otandastarymyzdyń qily taǵdyry film ózegine ainalady.
Keńes odaǵy Angoladaǵy azamattyq soǵysqa nelikten aralasty? Qandai qoldaý kórsetti? Áskerilerge qandai mindet júkteldi? Derekti film avtorlary bul saýaldardyń jaýabyn izdeidi.
Keńes operatsiiasynyń beimálim betteri, kapitalizm men sotsializmniń teketiresi arnaiy jobada talqyǵa salynady.
Angolada astyrtyn qyzmet etken qazaqstandyq áskeriler suhbat berip, sol bir surapyl jyldardaǵy bastan keshken oqiǵalaryn eske alady.
Sál sheginis jasasaq. Afrikanyń batysyn boilap jatqan Angola memleketi 1975 jyly 11 qarashada táýelsizdigin jariialaǵan. Uzaq jyldar Portýgaliianyń otary bolǵan eldiń egemendik alýy ońaiǵa túspedi.
Jergilikti halyq otarshylarynyń ústemdigine qarsy azattyq kúresin úzdiksiz júrgizgen. Ásirese 1961 jyly bastalǵan ult-azattyq qozǵalysy táýelsizdik úshin jasalǵan birden-bir qadam boldy. El patriottary Portýgaliia basqynshylaryna qarsy qarýly kúreske shyǵady. Bul kúrestiń basynda Angolany azat etý jolyndaǵy halyqtyq qozǵalys partiiasy turady.
Dál sol jyly mamyr aiynda Keńes úkimeti "Angoladaǵy jaǵdai týraly" arnaiy málimdeme jasaidy. Ol málimdemede Portýgaliia otarshyldary aiyptalyp, búkil dúniejúzin Angola halqynyń quqyn qorǵaýǵa shaqyrady.
Osy kezden bastap Keńes úkimet tarapy qol ushyn soza bastaidy. Angola sarbazdaryn oqytý úshin komandirler, nusqaýshylar men úiretýshiler jiberilip, qarý-jaraq túrinde kómek kórsetiledi. Angolaǵa attanǵandardyń ishinde qazaqstandyq áskeriler de az bolmaǵan.
Búginge deiin elimizde "16 jylǵa sozylǵan Angola soǵysyna" qazaqstandyqtardyń qatysýy týraly aqparattar ashyq aityla bermedi.
Bul derekti film qara qurlyqtaǵy qupiia missiia týraly aitylmaǵan aqparattardy el nazaryna usynyp, óz mindetin aboroimen atqarǵan azamattarymyzdyń jankeshti jyldarynan syr shertedi.
