"قازاق" لاقاپ اتىمەن تانىمال مما فايتەرٸ باعدات دٷيسەمباەۆ مەسكەۋ ورتالىعىندا بولعان جانجالدىڭ جاي-جاپسارىن ايتىپ بەردٸ, - دەپ حابارلايدى Tengrinews.kz تٸلشٸسٸ رەن-تۆ ارناسىنا سٸلتەمە جاساپ.
30 جاستاعى سپورتشىنىڭ ايتۋىنشا, ول 17 اقپاندا تاڭەرتەڭ دوستارىمەن وردجونيكيدزە كٶشەسٸندەگٸ سپورت كلۋبىنا ابونەمەنت الۋعا كەلگەن. بۇعان دەيٸن ولارعا جەڭٸلدٸك بەرٸلەتٸنٸ ايتىلعان ەكەن. اۆتوتۇراقتا دٷيسەمباەۆ پەن ونىڭ دوستارىنا كٷزەتشٸلەر كەلٸپ, كٶلٸكتٸ بەس مينۋتتا الىپ تاستاۋى كەرەك ەكەنٸن, سەبەبٸ بۇل كەدەرگٸ كەلتٸرەتٸنٸن ايتقان.
الايدا ابونەمەنت ساتۋى تيٸس ورتالىق قىزمەتكەرلەرٸ كەشٸككەن, ال كٷزەتشٸلەر دٷيسەمباەۆتىڭ ايتۋىنشا, تاعى كەلٸپ اۋماقتان كەتۋدٸ دٶرەكٸ تٷردە تالاپ ەتە باستاعان.
"مەن "اشۋلانىپ, بٸر-بٸرٸمٸزدٸڭ ميىمىزدى قاتىرماي-اق قويايىق" دەپ ايتتىم. ول كەتٸپ قالدى. بەس مينۋتتان كەيٸن ول بٸر جەرگە كٸرٸپ, قايتىپ شىقتى... مىلتىق الىپ شىعىپ وقتاي باستادى", - دەدٸ فايتەر.
"قازاق" ەشكٸم ەشكٸمدٸ قورقىتپاعاندىقتان, كٷزەتشٸ وق جاۋدىرادى دەپ ويلاماعانىن مويىندادى.
"مۇندايدى كٶپ كٶرسەتەدٸ عوي, قورقىتادى, اسپانعا وق اتادى. سولاي قورقىتادى دەپ ويلادىم. ەشتەڭە سۇرامادىم, ەشتەڭە ايتپادىم. سوسىن وق جاۋدىرا باستادى", - دەدٸ جاۋىنگەر.
كەيٸن سپورتشى اۋرۋحاناعا جاتقىزىلعان. باعداتقا التى وق اتىلعان. دەرٸگەرلەر وقتاردى فايتەردٸڭ دەنەسٸنەن شىعارۋعا مەجبٷر بولعان.
ايتا كەتەيٸك, 16 اقپاندا قازاقستاندىق مما فايتەرٸ باعدات دٷيسەمباەۆتى مەسكەۋدە فيتنەس كلۋبتىڭ كٷزەتشٸسٸ اتقانى حابارلانعان بولاتىن. سپورتشىعا 6 جەرٸنەن وق تيگەن.
