الماتى پوليتسەيلەرٸ تۇرعىن ٷيدٸڭ 20-شى قاباتىنان سەكٸرمەك بولعان جاس انانى قۇتقاردى, دەپ حابارلايدى "ۇلت اقپارات".
الماتى پوليتسيياسىنىڭ «102» پۋلتٸنە «مانحەتتەن» تۇرعىن ٷي كەشەنٸنٸڭ تۇرعىندارىنان حابارلاما تٷسكەن. ولار ٷيلەردٸڭ بٸرٸنٸڭ 20-قاباتىندا دەلٸزدەگٸ بالكوننان اياعىن سىرتقا سالبىراتىپ وتىرعان ەيەل تۋرالى ايتقان. كٶرسەتٸلگەن مەكەنجايعا دەرەۋ بۋران-080 پاترۋلدٸك توبى اتتانعان. وقيعا ورنىنا جەتكەن پوليتسييا اعا لەيتەنانتى سايات بەكجانوۆ پەن پوليتسييا پودپولكوۆنيگٸ نۇرسۇلتان بەكتۇرسىن بۇل اقپاراتتى راستاپ, عيماراتتىڭ 20-قاباتىنا كٶتەرٸلگەن.
«بٸردەن شارا قولدانۋعا كٶشتٸك. وعان اقىرىن جاقىندادىق: ەيەل بالكوننىڭ شەتٸندە وتىر ەكەن. جانىندا بالا ارباسى تۇردى, ٸشٸندە كٸشكەنتاي سەبي جاتتى. كٶرشٸ ٷيدٸڭ تۇرعىندارى ەيەلدٸڭ نازارىن ٶزدەرٸنە اۋدارىپ, مۇنداي شەشٸمنەن باس تارتۋىن ٶتٸنٸپ جاتتى. جاعدايدى باعالاي وتىرىپ, جٷگٸرە جانىنا جەتتٸك تە, بالكوننان ٸشكە تٷسٸرٸپ الدىق. جاعدايدى سۇراعانىمىزدا ەيەل ەشتەڭە ايتا الماي, جىلادى. مەن ونى قۇشاقتاپ, جۇباتۋعا تىرىسقانىمدا, ول قاتتى جىلاي باستادى. ونىڭ پروبلەماسى بولعانى انىق. ەڭ باستىسى, جاس انا مەن ونىڭ التى ايلىق بالاسى قۇتقارىلدى», - دەدٸ الماتى قالالىق جول-پاترۋلدٸك قىزمەتٸنٸڭ پوليتسەيٸ سايات بەكجانوۆ.
بەلگٸلٸ بولعانداي, ەيەلدٸڭ جاسى – 26-دا, التى ايلىق بالاسى بار, تۇرمىسقا شىققان. كٷيەۋٸ باسقا قالادا جۇمىس ٸستەيدٸ. قازٸر پوليتسييا جاس انانىڭ مۇنداي ەرەكەتكە بارۋىنا نە سەبەپ بولعانىن انىقتاپ جاتىر. سونداي-اق, ونىمەن پسيحولوگ جۇمىس ٸستەۋدە.
