الماتىدا بۇزاقى زەينەتكەرگە پىشاقپەن شابۋىل جاسادى. ونى راديوەلەكترونيكا جəنە بايلانىس əسكەري-ينجەنەرلٸك ينستيتۋتىنىڭ əسكەري قىزمەتشٸلەرٸ قۇتقاردى. وسى وقيعاعا قاتىستى پوليتسييا تٷسٸنٸكتەمە بەردٸ, دەپ حابارلايدى "ۇلت اقپارات".
الماتى قالالىق پد باسپاسٶز قىزمەتٸنٸڭ حابارلاۋىنشا, 1948 جىلى تۋعان چ. ەسٸمدٸ ازامات پوليتسيياعا ارىزداندى.
«بۇل وقيعا تۋرالى بٷگٸن قورعانىس مينيسترلٸگٸنەن ەستٸدٸك. ارنايى تەكسەرۋ جٷرگٸزدٸك. ونىڭ جەكە باسىن انىقتادىق. سٶيلەستٸك. نەتيجيەسٸندە زەينەتكەردٸ ەشكٸم توناماعانى انىقتالدى. ونىڭ ايتۋىنشا, 24 سەۋٸردە بەلگٸسٸز بٸرەۋ بۇزاقىلىق نيەتپەن قولىن پىشاقپەن تٸلٸپ, قاشىپ كەتكەن. بٷگٸن بۇل فاكت سوتقا دەيٸنگٸ تەرگەۋدٸڭ بٸرىڭعاي تٸزٸلٸمٸنە قرقك 293 بابى - بۇزاقىلىق بويىنشا تٸركەلدٸ. قىلمىستىق پروتسەستٸ مەدەۋ اۋدانىنىڭ اۋماقتىق پوليتسييا باسقارماسى جٷزەگە اسىرادى. كٷدٸكتٸ مٸندەتتٸ تٷردە ۇستالىپ, جاۋاپقا تارتىلادى «, - دەدٸ الماتى قالاسى دپ-نٸڭ رەسمي ٶكٸلٸ سالتانات ەزٸربەك.
زەينەتكەردٸڭ ايتۋىنشا, وقيعا ورتالىق كولحوز بازارى ماڭىندا بولعان.
«ماعان 25-30 جاس شاماسىنداعى بٸر جاس جٸگٸت كەلدٸ. ول مەنەن تەمەكٸ سۇرادى. مەن شىلىم شەكپەيتٸنٸمدٸ ايتتىم, سول كەزدە ول مەنٸڭ قولىما جەڭٸل جاراقات سالىپ, قاشىپ كەتتٸ «, - دەيدٸ زەينەتكەر.
ايتا كەتەيٸك, راديوەلەكترونيكا جəنە بايلانىس əسكەري-ينجەنەرلٸك ينستيتۋتىنىڭ əسكەري قىزمەتشٸلەرٸ دٸنمۇحامەد التىنبەك پەن ەرزات بەكپولوۆ جانگەلدين جəنە جٷرگەنوۆ كٶشەلەرٸنٸڭ قيىلىسىندا جاتقان ەگدە جاستاعى ەر ادامدى قۇتقاردى.
