تٶتەنشە جاعداي رەجيمٸ كەزٸندە ازاماتتاردى بلوكپوستان ٶتكٸزگەن جەتٸسۋ اۋدانى ەكٸمدٸگٸنٸڭ قىزمەتكەرلەرٸ سوتتالدى, دەپ حابارلايدى "ۇلت اقپارات".
سىبايلاس جەمقورلىققا قارسى ٸس-قيمىل اگەنتتٸگٸنٸڭ حابارلاۋىنشا, وسى جىلدىڭ 14 مامىرىندا الماتى قالاسى جەتٸسۋ اۋدانىنىڭ №2 اۋداندىق سوتى جەتٸسۋ اۋدانى ەكٸمٸ اپپاراتىنىڭ باس ماماندارى ك.ە. ەدەنوۆ پەن س.س. ورازوۆقا قاتىستى ايىپتاۋ ٷكٸمٸن شىعارعان. ك.ە. ەدەنوۆ پەن س.س. ورازوۆ بٸرنەشە رەت پارا العانى ٷشٸن كٸنەلٸ دەپ تانىلىپ, ولارعا تيٸسٸنشە 4 077 500 تەڭگە جەنە 13 300 000 تەڭگە ايىپپۇل سالىنىپ وتىر.
«سوت ولارعا ٶمٸر بويى مەملەكەتتٸك قىزمەتتە لاۋازىم اتقارۋعا تىيىم سالدى. سونىمەن قاتار, وسى ٷكٸممەن ازامات ۆ.ي. ۋدجۋر پارا الۋ كەزٸندە دەلدالدىق جاساعانى ٷشٸن كٸنەلٸ دەپ تانىلىپ, وعان 2 430 000 تەڭگە كٶلەمٸندە ايىپپۇل سالىندى», - دەپ حابارلايدى اگەنتتٸكتەن.
اتالعان لاۋازىمدى ادامداردىڭ جەتٸسۋ اۋدانىنداعى بلوكپوستتا كەدەرگٸسٸز ٶتۋ ٷشٸن الماتى قالاسىنىڭ تۇرعىندارىنان دەلدال ارقىلى بٸرنەشە رەت پارا العانى بۇعان دەيٸن حابارلانعان بولاتىن.
