الماتى وبلىسىندا ٶكپەسٸ 90% قابىنعان ەيەل 47 كٷن جانساقتاۋ بٶلٸمٸندە جاتقان, دەپ حابارلايدى قازاقپارات.
الماتى وبلىسىنىڭ ٸلە اۋدانىندا ٶكپەسٸ تولىق زاقىمدانعان جٷكتٸ ەيەل قازٸر ساۋىعىپ شىققان. ەمدەۋ ەكستراكورپورالدى مەمبرانالىق وكسيگەناتسييانى قولدانۋ ارقىلى ٶتتٸ.
ٶكپەسٸ 90% زاقىمدانعان جٷكتٸ ەيەل COVID-19 دياگنوزىمەن ٸلە اۋداندىق ورتالىق اۋرۋحاناسىنا تٷسكەن.
اۋرۋحانا ديرەكتورى باۋىرجان ىسقاق ەيەلدٸڭ ٶمٸرٸن ەكمو اپپاراتىنىڭ كٶمەگٸمەن امان الىپ قالعانىن ايتتى.
«9 تامىزدا 38-39 اپتا جٷكتٸلٸك مەرزٸمٸ بار 27 جاستاعى ەيەل ٶتە اۋىر حالدە تٷستٸ. وعان شۇعىل وپەراتسييا جاساپ, بالا امان-ەسەن تۋىلدى. بٸراق ەيەلدٸڭ جاعدايى ناشارلادى, قاندى وتتەگٸمەن بايىتۋ ٷشٸن ناۋقاستى ەكمو اپپاراتىنا قوسۋعا تۋرا كەلدٸ. 31 كٷننەن كەيٸن ەيەل ٶز بەتٸنشە دەم الا الدى», - دەدٸ اۋرۋحانا باسشىسى.
تٶرت بالانىڭ اناسى بايانسۇلۋ امانگەلديەۆا جانساقتاۋ بٶلٸمٸنٸڭ مەديتسينا قىزمەتكەرلەرٸنٸڭ كٶمەگٸمەن قايتادان ٶز بەتٸنشە دەم الىپ, قوزعالاتىن حالگە جەتكەن.
«مەن 47 كٷن رەانيماتسييادا جاتتىم. سول كەزدەگٸ بار ارمانىم بالالارىمدى قايتادان كٶرۋ بولدى. اۋىرماي تۇرىپ قوعامدىق ورىندا جٷرگەندە بەتپەردە كيمەيتٸنمٸن, ول كەزدە بەتپەردەمەن اۋا جەتپەيتٸن سيياقتى كٶرٸنگەن ەدٸ. ٸندەت جۇقتىرىپ, دەم جەتپەي, تىنىسىم تارىلعان كەزدە, ساقتىق شارالارىن ساقتاماعانىما ٶكٸندٸم. ٶزٸمنٸڭ بەيقامدىعىم سالدارىنان اۋرۋحاناعا تٷسٸپ, تۋىستارىم مەن دەرٸگەرلەردٸ ەۋرە-سارساڭعا سالدىم. بٷگٸندە قۇلان-تازا ايىعىپ, وتباسىما ورالدىم. بارىن سالىپ, مەنٸ ەمدەپ شىققان اق حالاتتىلارعا العىسىم شەكسٸز», - دەيدٸ ول.
ايتا كەتەيٸك, ناۋقاس اۋرۋحانادا 58 كٷن بويى ەم العان. ونىڭ 47 كٷنٸن رەانيماتسييادا ٶتكٸزگەن. ودان بٶلەك, ٸلە اۋدانىندىق اۋرۋحاناسىنىڭ دەرٸگەرلەرٸ ٶكپەسٸ 80% قابىنعان 5 جٷكتٸ ەيەلدٸ ٸندەتتەن امان الىپ شىققان.
