Almaty oblysynda ókpesi 90% qabynǵan áiel 47 kún jansaqtaý bóliminde jatqan, dep habarlaidy QazAqparat.
Almaty oblysynyń Ile aýdanynda ókpesi tolyq zaqymdanǵan júkti áiel qazir saýyǵyp shyqqan. Emdeý ekstrakorporaldy membranalyq oksigenatsiiany qoldaný arqyly ótti.
Ókpesi 90% zaqymdanǵan júkti áiel COVID-19 diagnozymen Ile aýdandyq ortalyq aýrýhanasyna túsken.
Aýrýhana direktory Baýyrjan Ysqaq áieldiń ómirin EKMO apparatynyń kómegimen aman alyp qalǵanyn aitty.
«9 tamyzda 38-39 apta júktilik merzimi bar 27 jastaǵy áiel óte aýyr halde tústi. Oǵan shuǵyl operatsiia jasap, bala aman-esen týyldy. Biraq áieldiń jaǵdaiy nasharlady, qandy ottegimen baiytý úshin naýqasty EKMO apparatyna qosýǵa týra keldi. 31 kúnnen keiin áiel óz betinshe dem ala aldy», - dedi aýrýhana basshysy.
Tórt balanyń anasy Baiansulý Amangeldieva jansaqtaý bóliminiń meditsina qyzmetkerleriniń kómegimen qaitadan óz betinshe dem alyp, qozǵalatyn halge jetken.
«Men 47 kún reanimatsiiada jattym. Sol kezdegi bar armanym balalarymdy qaitadan kórý boldy. Aýyrmai turyp qoǵamdyq orynda júrgende betperde kimeitinmin, ol kezde betperdemen aýa jetpeitin siiaqty kóringen edi. Indet juqtyryp, dem jetpei, tynysym tarylǵan kezde, saqtyq sharalaryn saqtamaǵanyma ókindim. Ózimniń beiqamdyǵym saldarynan aýrýhanaǵa túsip, týystarym men dárigerlerdi áýre-sarsańǵa saldym. Búginde qulan-taza aiyǵyp, otbasyma oraldym. Baryn salyp, meni emdep shyqqan aq halattylarǵa alǵysym sheksiz», - deidi ol.
Aita keteiik, naýqas aýrýhanada 58 kún boiy em alǵan. Onyń 47 kúnin reanimatsiiada ótkizgen. Odan bólek, Ile aýdanyndyq aýrýhanasynyń dárigerleri ókpesi 80% qabynǵan 5 júkti áieldi indetten aman alyp shyqqan.
