الماتى وبلىسىندا قونجىعىن قورعاماق بولعان ايۋ بالىق اۋلاۋعا بارعان ادامدى تالاپ ٶلتٸردٸ, – دەپ حابارلايدى Polisia.kz.
قايعىلى وقيعا 30 مامىر كٷنٸ ساعات 06.25 شاماسىندا الماتى وبلىسى الاكٶل اۋدانىنىڭ تاۋلارىندا ورىن الدى. ايۋ 1979 جىلعى رەسەي فەدەراتسيياسىنىڭ ازاماتىنا شابۋىل جاساعان. اتالعان دەرەك سوتقا دەيٸنگٸ تەرگەپ-تەكسەرۋدٸڭ بٸرىڭعاي تٸزٸلٸمٸنە وقىس وقيعا رەتٸندە تٸركەلدٸ.
– كۋەگەرلەردٸڭ ايتۋى بويىنشا, قايتىس بولعان ادام تۋىستارىنا دەمالۋعا كەلگەن لەپسينسك اۋىلىنىڭ تۋماسى. 28 مامىر كٷنٸ وقىس وقيعاعا تاپ بولعان ەر ادام “لايكا” تۇقىمدى يتتٸمەن جەنە ٷش تانىسىمەن بٸرگە اتپەن لەپسٸ ٶزەنٸنە بالىق اۋلاۋعا بارعان. 30 مامىر كٷنٸ, ٷيگە قايتىپ كەلە جاتىپ, جولاۋشىلار التى شاقىرىمعا جۋىق جول جٷرگەن. سول سەتتە يت ايۋدىڭ قونجىقتارىن بايقاپ ونى قۋعان. يتتٸ بورسىقتىڭ ٸزٸنە تٷستٸ دەپ ويلاعان اتتى جولاۋشى سوڭدارىنان ەرگەن. اعاشتاردىڭ ٶسٸندٸسٸنە جٷگٸرٸپ كەتكەن يت, بٸر مەزەتتە قاتتى ۇلىعان. قازا بولعان ادام يتٸنە كٶمەكتەسپەك بولىپ اعاش ٶسٸندٸلەرٸنە كٸرٸپتٸ. بٸراز ۋاقىت ٶتە ەر ادامنىڭ قاتتى داۋىسى ەستٸلگەن. سول سەتتە بۇتالاردى سىندىرا ٶسٸندٸ اراسىنان, جىلقى مەن ادامداردى قورقىتا ايۋ شىعىپ, ورمانعا قاراي قاشقان. قازا بولعان ادامنىڭ دوستارى ونىڭ دەنەسٸن كٶپتەگەن سىنىقتار مەن جاراقاتتارى بار, ٶمٸر بەلگٸلەرٸنسٸز تاپقان, زاقىمدانۋلار يتتەن دە تابىلعان, – دەيدٸ الاكٶل اۋداندىق پوليتسييا بٶلٸمٸنٸڭ باسشىسى قۋات وسپانوۆ.
پوليتسەيلەر كٶكتەمگٸ كەزەڭدە ايۋلار ٶز قونجىقتارىن قورعاۋ ماقساتىندا اگرەسسيۆتٸ بولاتىندىعىن جەنە وسىعان بايلانىستى ساقتىق شارالارىن ساقتاۋ قاجەتتٸلٸگٸن ەسكەرتتٸ. ادامعا شابۋىل جاساۋعا يتەرمەلەگەن سەبەپ رەتٸندە ايۋدىڭ قونجىعىن قورعاماق بولعانىنا بايلانىستى, ايۋ اتىلمايدى.
