بەلارۋس پرەزيدەنتٸ الەكساندر لۋكاشەنكو ەلدە كوروناۆيرۋستىڭ جاڭا تٷرٸنٸڭ تارالۋىنا جول بەرمەۋ تۋرالى ايتتى, دەپ حابارلايدى "ۇلت اقپارات" بەلتا-عا سٸلتەمە جاساپ.
«بٸز مىنا جاعدايدى ەرەكشە ەسكەرۋٸمٸز كەرەك – قولدارىڭىزدى ٷنەمٸ جۋىپ, كٶشەدە تانىمايتىن ادامدارمەن قۇشاقتاسىپ, امانداسپاڭىزدار. مەن جەكە گيگيەنا تۋرالى ايتىپ تۇرمىن. قالعانىنىڭ بارلىعىنا دەنساۋلىق ساقتاۋ مينيسترلٸگٸ جاۋاپ بەرەدٸ. بارلىعى ٶزٸمٸزگە بايلانىستى. سوندىقتان ٶزدەرٸڭٸزدٸ, بالالاردى, ەسٸرەسە كٸشكەنتاي بالاقايلاردى قاۋٸپ-قاتەردەن ساقتاڭىزدار. مەملەكەت تاراپىنان تيٸستٸ شارالار قابىلدانادى», - دەدٸ بەلارۋس پرەزيدەنتٸ.
الەكساندر لۋكاشەنكو بەلارۋستە رەسەيدەگٸدەي دٷرلٸكپە جاعدايلاردىڭ بولماعانىن, جاپپاي مەديتسينالىق ماسكالار ساتىپ الىنباعانىن اتاپ ٶتتٸ.
«ەشكٸم دە دٷرلٸگٸپ, جٷگٸرٸپ جٷرگەن جوق. قازٸرگٸ ۋاقىتتا ادامداردىڭ قاۋٸپسٸزدٸگٸن ساقتاۋ باعىتتارىندا جۇمىستار اتقارىلۋدا. كوروناۆيرۋس جۇقتىرعان ادامداردى وقشاۋلاندىرىپ, ەمدەيمٸز. الايدا بٸزدە ونداي فاكتٸ تٸركەلگەن جوق», - دەپ تٷيٸندەدٸ الەكساندر لۋكاشەنكو.
