Belarýs Prezidenti Aleksandr Lýkashenko elde koronavirýstyń jańa túriniń taralýyna jol bermeý týraly aitty, dep habarlaidy "Ult aqparat" BELTA-ǵa silteme jasap.
«Biz myna jaǵdaidy erekshe eskerýimiz kerek – qoldaryńyzdy únemi jýyp, kóshede tanymaityn adamdarmen qushaqtasyp, amandaspańyzdar. Men jeke gigiena týraly aityp turmyn. Qalǵanynyń barlyǵyna Densaýlyq saqtaý ministrligi jaýap beredi. Barlyǵy ózimizge bailanysty. Sondyqtan ózderińizdi, balalardy, ásirese kishkentai balaqailardy qaýip-qaterden saqtańyzdar. Memleket tarapynan tiisti sharalar qabyldanady», - dedi Belarýs Prezidenti.
Aleksandr Lýkashenko Belarýste Reseidegidei dúrlikpe jaǵdailardyń bolmaǵanyn, jappai meditsinalyq maskalar satyp alynbaǵanyn atap ótti.
«Eshkim de dúrligip, júgirip júrgen joq. Qazirgi ýaqytta adamdardyń qaýipsizdigin saqtaý baǵyttarynda jumystar atqarylýda. Koronavirýs juqtyrǵan adamdardy oqshaýlandyryp, emdeimiz. Alaida bizde ondai fakti tirkelgen joq», - dep túiindedi Aleksandr Lýkashenko.
