اقتٶبەدەگٸ №74 ورتا مەكتەپتەن شۋ شىقتى. مەديتسينا قىزمەتكەرلەرٸ بٸرٸنشٸ سىنىپ وقۋشىلارىنا مانتۋدىڭ ورنىنا بتسج ۆاكتسيناسىن ەككەن. بۇل قاتەلٸكتٸ اتا-انالار ەكٸ اپتا ٶتكەن سوڭ بٸلگەن. ەندٸ 42 بالانىڭ جاقىندارى جاۋاپسىز مەديتسينا قىزمەتكەرلەرٸن جاۋاپقا تارتۋدى تالاپ ەتٸپ وتىر, دەپ حابارلايدى استانا ارناسى.
اتا-انالاردىڭ ايتۋىنشا, بالالاردىڭ كٶپشٸلٸگٸ ٶزدەرٸن جەيسٸز سەزٸنگەن. ەكپە سالعان جەر قاتتى ٸسٸپ, ٸرٸڭدەگەن. تٸپتٸ, قولدارىن كٶتەرە الماي قالعاندارى دا بولىپتى. انىقتاي كەلە, بالالارعا مانتۋدىڭ ورنىنا يىققا سالاتىن تٸرٸ ۆاكتسينا ەگٸلگەنٸ انىقتالدى.
""جيۆايا ۆاكتسينا" ەنگٸزٸلٸپ كەتكەن. ول اعزاداعى بارلىق جاسۋشانى وياتادى دەيدٸ. ەندٸ باستالىپ جاتىر. پروتسەسس جٷرٸپ جاتىر. مٸنە, ەكٸ جەتٸدەن اسىپ كەتتٸ. بالا قولىن كٶتەرە المايدى. بەزدەرٸ شوشىنعان. قولتىق استى. تاماق بەزدەرٸ شوشىنعان. ٶزٸمەن ٶزٸ جاتا بەرەدٸ. ەلسٸزدٸك پايدا بولدى", - دەيدٸ اتا-انا راۋشان يساەۆا.
ال مەديتسينا قىزمەتكەرلەرٸ اتا-انالاردان التى ايدى كٷتۋدٸ سۇراعان. سول كەزدە ۆاكتسينا كٷشٸ جويىلاتىن كٶرٸنەدٸ.
"قۇتىنىڭ سىرتىندا جازىلىپ تۇرادى ەكەن بەرٸ. تٷسٸ دە باسقا بولادى. سوندا قالاي شاتاستىرعان? تٷك تٷسٸنٸكسٸز. بٸلەك تەرٸسٸ ٶتە جۇقا. اعزاعا ۆاكتسينا تٷسٸپ ٷلگەردٸ. ولار بٸزگە 6 اي كٷتۋدٸ سۇرايدى. كٷتٸپ وتىراتىن بولساڭ, ەشكٸم كەپٸلدٸك بەرمەيدٸ. مٷگەدەكتٸككە الىپ كەلۋٸ مٷمكٸن", - دەيدٸ تاعى بٸر اتا-انا شىنار بەكبولاتقىزى.
بۇل ۆاكتسينانى سالعان مەديتسينا قىزمەتكەرلەرٸ جەكە كلينيكانىڭ ماماندارى كٶرٸنەدٸ. ولار مەملەكەتتٸك تاپسىرىس بويىنشا قىزمەت كٶرسەتكەن. وسىنداي جاعدايدان كەيٸن دەرٸگەر دە, مەدبيكە دە جۇمىستان بوساتىلعان. پروكۋراتۋرا تەكسەرٸس جٷرگٸزٸپ جاتىر.
"قاتەلٸكتٸ جٸبەرگەن - مەديتسينا قىزمەتكەرلەرٸ. ولار ٶز قاتەلٸكتەرٸن مويىنداپ وتىر. ەندٸ 42 بالا وسىنداي جاعداي بولعان سوڭ, نە بولاتىنىن ەشكٸم ايتا المايدى. تەك قانا بٸزدٸڭ ٶزٸمٸز ايتاتىنىمىز, باسقا جەرگە سالىنىپ, تەحنيكالىق اقاۋ كەتكەنٸ راس. كەشەگٸ شەشٸم بويىنشا بۇل بالالاردىڭ بارلىعى مەكتەپتە كٷندەلٸكتٸ باقىلاۋدا بولادى", - دەيدٸ اقتٶبە وبلىستىق دسب باسشىسىنىڭ ورىنباسارى باقىتجان تٷلكٸباەۆا.
