فوتو: instagram.com/saniya_bulqairqyzy
اقتٶبە مەسليحاتىنىڭ دەپۋتاتى سەنييا مۇراتوۆا جٷرگٸزۋشٸ كۋەلٸگٸنەن جەنە دەپۋتاتتىق ٶكٸلەتٸنەن ايىرىلدى, - دەپ حابارلايدى Tengrinews.kz تٸلشٸسٸ.
53 جاستاعى ەكس-دەپۋتات الداعى جارتى جىلدا كٶلٸك جٷرگٸزە المايدى.
25 قىركٷيەكتە ەكٸمشٸلٸك قۇقىق بۇزۋشىلىق ٸستەر جٶنٸندەگٸ مامانداندىرىلعان اۋدانارالىق سوتى وعان قاتىستى ٸستٸ قارادى. مۇراتوۆا قر ەقبتك-نٸڭ 596-بابى 3-بٶلٸگٸندە كٶزدەلگەن قۇقىقبۇزۋشىلىقتى جاساعانى ٷشٸن التى اي مەرزٸمگە كٶلٸك قۇرالىن باسقارۋ قۇقىعىنان ايىرىلدى. ٶزٸ سوتقا كەلمەدٸ.
"2023 جىلدىڭ 5 قىركٷيەگٸندە تاڭعى ساعات جەتٸلەر شاماسىندا ازاماتشا سەنييا بۇلقايىرقىزى مۇراتوۆا مولداعۇلوۆا كٶشەسٸ مەن سەڭكٸباي-باتىر داڭعىلى قيىلىسىندا التى جولاقتى جولدا قوس ٷزٸكسٸز سىزىقتى كەسٸپ ٶتكەن. وسىعان بايلانىستى ونىڭ ٷستٸنەن ەقبتك-نٸڭ 596-بابى 3-بٶلٸگٸ بويىنشا حاتتاما تولتىرىلدى. سەنييا مۇراتوۆا زاڭبۇزۋشىلىقپەن كەلٸسٸپ, حاتتاماعا قول قويدى", - دەدٸ سوتقا قاتىسقان اقتٶبە قالالىق پب پاترۋلدٸك پوليتسييا ينسپەكتورى مٷسٸرەپ جانبولاتۇلى وقيعانىڭ كەيبٸر جاي-جاپسارى تۋرالى.
ايتا كەتەيٸك, وسىعان دەيٸن دەپۋتات مۇراتوۆا جول قوزعالىسى ەرەجەسٸن ەكٸ رەت بۇزعانى حابارلانعان بولاتىن. بٸرٸنشٸ جاعدايدا, ول كٶلٸكتٸ جٷرگٸزٸپ كەلە جاتىپ, قوس ٷزٸكسٸز سىزىقتى كەسٸپ ٶتكەن. ارادا بٸر اپتا ٶتكەندە, 20 قىركٷيەكتە دەپۋتاتتىڭ كٶلٸكتٸ ماس كٷيدە باسقارعانى تٸركەلدٸ. ەكٸنشٸ فاكت بويىنشا سوت ٸستٸ ەلٸ قاراعان جوق.
سەنييا مۇراتوۆا دەپۋتاتتىق ٶكٸلەتٸنەن ايىرىلعانى بەلگٸلٸ بولدى. اقتٶبە قالالىق مەسليحاتىنىڭ تٶراعاسى انار دارجانوۆانىڭ ايتۋىنشا, سەسسييا وتىرىسىندا اقتٶبە قالالىق مەسليحاتىنىڭ دەپۋتاتتارى سەنييا مۇراتوۆانىڭ دەپۋتاتتىق ٶكٸلەتٸن مەرزٸمٸنەن بۇرىن توقتاتۋ تۋرالى اقتٶبە اۋماقتىق سايلاۋ كوميسسيياسىنىڭ (اسك) ۇسىنىسىن قارادى. ونى دەپۋتاتتار قاراپ, قولدادى.
"س.مۇراتوۆانىڭ ٶكٸلەتتٸگٸ توقتاتىلدى", - دەدٸ اقتٶبە قالالىق مەسليحاتىنىڭ تٶراعاسى انار دارجانوۆا.
