اقش كونگرەسٸنٸڭ ٶكٸلدەر پالاتاسى پرەزيدەنت دونالد ترامپتىڭ سيرييادان امەريكا ەسكەرٸن الىپ كەتۋ تۋرالى شەشٸمٸن ايىپتاپ, رەزوليۋتسييا قابىلدادى.
رەزوليۋتسييادا تٷركييا سيرييا سولتٷستٸگٸندەگٸ ەسكەري وپەراتسيياسىن توقتاتۋى تيٸس دەپ جازىلعان. كونگرەسس ٶكٸلدەرٸ اق ٷيدەن "يسلام مەملەكەتٸ" تەرروريستٸك توبىمەن كٷرەس جٷرگٸزۋدٸڭ جوسپارىن كٶرسەتۋدٸ سۇرادى.
ترامپتىڭ ەسكەر الىپ كەتۋ تۋرالى شەشٸمٸن كونگرەستە رەسپۋبليكاشىلدار دا, دەموكراتتار دا سىنادى. دەپۋتاتتار ايماقتا سودىرلار توبى كٷشەيٸپ كەتە مە دەپ قاۋٸپتەنەدٸ. بۇعان دەيٸن پەنتاگون "يسلام مەملەكەتٸ" توبىنىڭ قايتا جاندانۋى مٷمكٸن ەكەنٸن ەسكەرتكەن.
دونالد ترامپ 16 قازاندا ٶتكەن ۆاشينگتونداعى باسپاسٶز جيىنىندا "تٷركييا مەن سيرييا قالىپتاسقان مەسەلەنٸ شەشە الاتىن شىعار" دەدٸ. ترامپ ۆاشينگتون دا مەسەلەنٸ رەتتەۋگە ارالاساتىنىن ايتتى. ول 17 قازاندا ۆيتسە-پرەزيدەنت مايك پەنس تٷركييا پرەزيدەنتٸ رەجەپ ەردوعانمەن كەزدەسەدٸ دەپ بۇل كەزدەسۋگە ٷلكەن ٷمٸت ارتاتىنىن جەتكٸزدٸ. اق ٷي باسشىسى پەنس پەن ەردوعان داعدارىستى شەشۋ بويىنشا كەلٸسٸمگە كەلە الماسا, انكاراعا سانكتسييا سالىنادى دەپ تاعى ەسكەرتتٸ.
9 قازاندا تٷركييا سيرييا سولتٷستٸگٸندە كٷردتەرگە قارسى ەسكەري وپەراتسييا باستاعان. انكارا كٷرد جاساقتارىن "تەرروريست" دەپ اتاپ, تٷركييا اۋماعىنداعى سەپاراتيستەرگە دەم بەردٸ دەپ ايىپتايدى. ۆاشينگتون انكارا ەرەكەتٸن سىناعانمەن ونىڭ ەرەكەتٸنە ارالاسپايدى دەپ ايتقان. ۆاشينگتون كٷردتەردٸ "يسلام مەملەكەتٸ" تەرروريستٸك توبىمەن كٷرەستە وداقتاس سانايدى.
بۇعان دەيٸن تٷرٸك شابۋىلىنان قورعانۋعا تىرىسقان كٷردتەر سيرييا بيلٸگٸمەن كەلٸسٸم جاساسقان. تٷرٸك ەسكەريلەرٸ داماسكٸ باقىلاۋىنا ٶتكەن قالاعا باسىپ كٸرمەيتٸنٸ ايتىلعان.
