AQSh kongresiniń ókilder palatasy Prezident Donald Tramptyń Siriiadan Amerika áskerin alyp ketý týraly sheshimin aiyptap, rezoliýtsiia qabyldady.
Rezoliýtsiiada Túrkiia Siriia soltústigindegi áskeri operatsiiasyn toqtatýy tiis dep jazylǵan. Kongress ókilderi Aq úiden "Islam memleketi" terroristik tobymen kúres júrgizýdiń josparyn kórsetýdi surady.
Tramptyń ásker alyp ketý týraly sheshimin kongreste respýblikashyldar da, demokrattar da synady. Depýtattar aimaqta sodyrlar toby kúsheiip kete me dep qaýiptenedi. Buǵan deiin Pentagon "Islam memleketi" tobynyń qaita jandanýy múmkin ekenin eskertken.
Donald Tramp 16 qazanda ótken Vashingtondaǵy baspasóz jiynynda "Túrkiia men Siriia qalyptasqan máseleni sheshe alatyn shyǵar" dedi. Tramp Vashington da máseleni retteýge aralasatynyn aitty. Ol 17 qazanda vitse-prezident Maik Pens Túrkiia prezidenti Rejep Erdoǵanmen kezdesedi dep bul kezdesýge úlken úmit artatynyn jetkizdi. Aq úi basshysy Pens pen Erdoǵan daǵdarysty sheshý boiynsha kelisimge kele almasa, Ankaraǵa sanktsiia salynady dep taǵy eskertti.
9 qazanda Túrkiia Siriia soltústiginde kúrdterge qarsy áskeri operatsiia bastaǵan. Ankara kúrd jasaqtaryn "terrorist" dep atap, Túrkiia aýmaǵyndaǵy separatisterge dem berdi dep aiyptaidy. Vashington Ankara áreketin synaǵanmen onyń áreketine aralaspaidy dep aitqan. Vashington kúrdterdi "Islam memleketi" terroristik tobymen kúreste odaqtas sanaidy.
Buǵan deiin túrik shabýylynan qorǵanýǵa tyrysqan kúrdter Siriia biligimen kelisim jasasqan. Túrik áskerileri Damaski baqylaýyna ótken qalaǵa basyp kirmeitini aitylǵan.
