الدييار جەنە ەلٸمجان جاۋىنباي سينگاپۋردە ٶتكەن جاس ەرەكشەلٸكتەرٸ بويىنشا تۋرنيردە ٶز ساناتتارىندا ەكەۋٸ بٸرگە تٶرت مەدال ەنشٸلەدٸ, ونىڭ ٷشەۋٸ التىن. بۇل تۋرالى قازاقستان شاحمات فەدەراتسيياسىنىڭ باسپاسٶز قىزمەتٸ حابارلايدى, دەپ حابارلايدى ult.kz.
اعايىندىلاردىڭ ٷلكەنٸ FIDE شەبەرٸ الدييار جاۋىنباي 20 جاسقا دەيٸنگٸ ساناتتا باق سىنادى. راپيد تۋرنيرٸندە ول 5,5 ۇپاي جيناپ, فيليپپيندٸك حالىقارالىق شەبەر كريستيان دجان كارلو اركا مەن ۆەتنامدىق چان زيا فۋك فامدى ارتقا تاستاپ, بٸرٸنشٸ ورىندى يەلەندٸ. الدييار ەكٸنشٸ التىندى بليتستە جەڭٸپ الدى. ول 9 تۋردىڭ قورىتىندىسى بويىنشا 7 ۇپاي جينادى. ودان كەيٸنگٸ ەكٸنشٸ ورىنعا ۆەتنامدىق سپورتشى چان زيا فۋك فام, ال ٷشٸنشٸ ورىنعا فيليپپيندٸك كريستيان دجان كارلو اركا جايعاستى. الدييارعا كلاسسيكادا جٷلدەلٸ ورىنعا جەتۋگە سەل عانا مٷمكٸندٸك جەتپەي قالدى. ول 6,5 ۇپاي جيناپ, 1-3 ورىن يەگەرلەرٸمەن بٸردەي نەتيجە كٶرسەتكەنٸمەن, قوسىمشا كٶرسەتكٸشتەر بويىنشا ەسە جٸبەرٸپ, تٶرتٸنشٸ ورىنعا تۇراقتادى.
ال ٸنٸسٸ FIDE شەبەرٸ ەلٸمجان جاۋىنباي 12 جاسقا دەيٸنگٸ ساناتتا ٶنەر كٶرسەتٸپ, ول دا ەكٸ مەدال ەنشٸلەدٸ. ەلٸمجان التىندى بليتستە 8 ۇپاي جيناپ, ۆەتنامدىق قارسىلاستارىن باسىپ وزۋ ارقىلى جەڭٸپ الدى. كٷمٸس مەدالدى كلاسسيكادا يەلەندٸ. ول 7 ۇپاي جيناپ, بٸرٸنشٸ ورىن يەگەرٸ ۆەتنامدىق فان حوانگ كۋان لەمەن تەڭ تٷستٸ, بٸراق قوسىمشا كٶرسەتكٸشتەر بويىنشا قارسىلاسىنا جول بەردٸ.
الدييار مەن ەلٸمجان جاۋىنباي قازاقستان شاحمات فەدەراتسيياسىنىڭ جاس تالانتتاردى قولداۋ باعدارلاماسىنىڭ قاتىسۋشىلارى. باعدارلاما ەلدٸڭ ەڭ مىقتى جاس شاحماتشىلارىن قولداۋعا باعىتتالعان: سپورتشىلار جاتتىقتىرۋشىلارمەن جۇمىس ٸستەۋگە, حالىقارالىق جارىستارعا قاتىسۋعا جەنە ٸرٸ تۋرنيرلەرگە دايىندالۋعا قولداۋ الادى. KazChess جاس دارىندى قولداۋ باعدارلاماسىنا 45 شاحماتشى قاتىسادى. جاۋىنباي باۋىرلارى بۇل باعدارلاماعا بٸرنەشە جىلدان بەرٸ قاتىسىپ كەلەدٸ. 2025 جىلى ەلٸمجان 11 جاسىندا قازاقستاندىق شاحمات تاريحىنداعى ەڭ جاس FIDE شەبەرٸ اتانعان ەدٸ.
