تٷركٸستان وبلىسىنىڭ سوزاق اۋدانىندا ارحەولوگتار سوڭعى قولا دەۋٸرٸ مەن قاڭلى مەملەكەتٸ كەزەڭٸنە جاتاتىن كٶنە قورىمداردى زەرتتەپ, ەرەكشە ولجاعا تاپ بولدى. ماماندار شامامەن 2 مىڭ جىل بۇرىن جەرلەنگەن ەيەلدٸڭ ٶلٸمٸنٸڭ سەبەبٸن انىقتاۋعا تىرىسىپ جاتىر, دەپ حابارلايدى ult.kz.
Otyrar ارناسىنىڭ مەلٸمەتٸنشە, قىزىلكٶل-1 قورىمىنداعى جەرلەۋ ورنىنان ەر ادام, ەيەل جەنە ەكٸ بالانىڭ سٷيەگٸ تابىلعان. ەيەلدٸڭ باس سٷيەگٸنٸڭ ساماي تۇسىنان دٶڭگەلەك تەسٸك انىقتالدى. الدىن الا بولجام بويىنشا, جاراقات ەجەلگٸ قارۋ — بالتا-شوقپاردىڭ سوققىسىنان پايدا بولۋى مٷمكٸن. عالىمدار ونىڭ تٸرٸ كەزٸندە جاراقات العانىن جەنە بۇل ٶلٸمگە سەبەپ بولۋى ىقتيمال ەكەنٸن ايتادى.
قازٸر ەكٸ نۇسقا قاراستىرىلىپ جاتىر. بٸرٸنشٸسٸ — ەيەل جەرلەۋ رەسٸمٸ كەزٸندە ٶلتٸرٸلگەن. ەكٸنشٸسٸ — ونىڭ شايقاسقا قاتىسىپ, ٶلٸمگە ەكەلگەن جاراقات العانى.
ٶزبەكەلٸ جەنٸبەكوۆ اتىنداعى وڭتٷستٸك قازاقستان پەداگوگيكالىق ۋنيۆەرسيتەتٸنٸڭ پروفەسسورى الەكساندر پودۋشكين ەيەلدٸڭ جاۋىنگەر بولۋى مٷمكٸن ەكەنٸن جوققا شىعارمايدى. سەبەبٸ قاڭلى قۇرامىندا سارماتتار سيياقتى تايپالار بولعان, ال سارماتتاردا ەيەلدەردٸڭ شايقاسقا قاتىسقانى بەلگٸلٸ.
ەيەلدٸڭ ناقتى قالاي قازا تاپقانىن انتروپولوگتار سٷيەكتەر مەن باس سٷيەگٸندەگٸ جاراقاتتى زەرتتەگەننەن كەيٸن انىقتايدى.
