Midjourney
جىل باسىنان بەرٸ قازاقستاندا بالالار ساۋداسىنا قاتىستى 19 قىلمىستىق ٸس تٸركەلدٸ. ولاردىڭ بەرٸ جاڭا تۋعان سەبيدٸ زاڭسىز اسىراپ الۋ كەلٸسٸمٸنە بايلانىستى, - دەپ حابارلايدى Tengrinews.kz .
ادام ساۋداسىمەن كٷرەس باسقارماسى باستىعىنىڭ ورىنباسارى شىنار كٶشەرباەۆانىڭ ايتۋىنشا, نەرەستەلەردٸ ساتۋ دەرەكتەرٸ قازاقستاننىڭ بارلىق دەرلٸك ٶڭٸرٸندە انىقتالعان.
سحەما مىناداي: بٸر جاقتا بالا سٷيە الماي جٷرگەن وتباسىلار, ەكٸنشٸ جاقتا جاڭا تۋعان سەبيدەن باس تارتۋعا دايىن ەيەلدەر. ال ولاردىڭ اراسىندا پايدا ٷشٸن ەكٸ جاقتى تابىستىراتىن دەلدالدار بار.
"بالالاردى شەتەلگە شىعارۋ دەرەكتەرٸ تٸركەلگەن جوق. بارلىق مەمٸلە ەل ٸشٸندە جٷرگەن. جاۋاپكەرشٸلٸكتٸ بالانى ساتقاندار دا, ونى ساتىپ العاندار دا كٶتەرەدٸ", – دەدٸ كٶشەرباەۆا.
پوليتسەيدٸڭ ايتۋىنشا, سەبيدەن باس تارتاتىنداردىڭ اراسىندا قالاعا كەلگەن, اۋىر قارجىلىق جاعدايدا قالعان قىزدار بار. كەيبٸر وتباسىلار دا نەرەستەنٸ اسىراي المايتىندىقتان وسىنداي قادامعا بارادى.
قۇقىق قورعاۋشىلاردىڭ دەرەگٸنشە, نەرەستەلەردٸ زاڭسىز ساتۋ مەمٸلەسٸنٸڭ ورتاشا باعاسى 500 مىڭنان 1,5 ميلليون تەڭگەگە دەيٸن ٶزگەرەدٸ.
ايتا كەتەتٸن جايت, 2025 جىلدىڭ باسىنان بەرٸ قازاقستاندا قىلمىستىق كودەكستٸڭ 135-بابى "ادام ساۋداسى" بويىنشا 19 قىلمىستىق ٸس تٸركەلگەن.
