سولتٷستٸك قازاقستان وبلىسىندا جاۋىن-شاشىن مٶلشەرٸن 16 مەتەوستانسا, 11 اگروپوست پەن سونشا گيدروپوست باقىلايدى. سينوپتيكتەر جاۋعان جاۋىن-شاشىن مٶلشەرٸنٸڭ قالاي ەسەپتەلٸنەتٸنٸن ايتىپ بەردٸ, دەپ حابارلايدى "ۇلت اقپارات".
«قازگيدرومەت» رمك سقو فيليالى ماماندارىنىڭ ايتۋىنشا, كٶپشٸلٸك بٸر قالادا نەمەسە اۋىلدا, مەسەلەن 10 مم جاڭبىر جاۋدى دەگەندٸ ەستٸپ, ونىڭ قانداي مٶلشەر ەكەنٸن بٸلە بەرمەيدٸ. ال قىستا جاۋىن-شاشىن مٶلشەرٸ مەن قار قالىڭدىعىن شاتاستىرادى.
وسى سۇراقتارعا جاۋاپ بەرۋ ٷشٸن سينوپتيكتەر ەلەۋمەتتٸك جەلٸدەگٸ ٶز پاراقشاسىندا 1 مم جاۋىن-شاشىننىڭ قانشا بولاتىنىن قاراپايىم مىسالدارمەن تٷسٸندٸرٸپ بەردٸ.
«اسپاننان جاۋاتىن جاڭبىر, قار, بۇرشاقتى اتموسفەرالىق جاۋىن-شاشىن دەپ اتايدى. ونىڭ مٶلشەرٸ ميلليمەترمەن ەسەپتەلەدٸ. ياعني جەرگە جاۋعان جاۋىننىڭ سٸڭٸپ, بۋلانىپ كەتپەگەن قالىڭدىعى ەسەپكە الىنادى. 1 مم جاۋىن-شاشىن بٸر شارشى مەتر اۋماققا تٶگٸلگەن 1 ليتر سۋعا تەڭ. ال 10 مم دەگەن بٸر شارشى مەترگە تٶگٸلگەن بٸر شەلەك سۋ», - دەيدٸ «قازگيدرومەت» ماماندارى.
سقو اۋماعىندا جاۋىن-شاشىن مٶلشەرٸن 16 مەتەوستانسا, 11 اگروپوست پەن سونشا گيدروپوست تەۋلٸگٸنە ەكٸ رەت ٶلشەيدٸ. مەسەلەن جاۋعان جاڭبىر ترەتياكوۆ جاۋىن-شاشىن ٶلشەگٸشٸ (وسادكومەر) دەپ اتالاتىن ارنايى قۇرىلعىدا جينالادى.
«وسادكومەردٸڭ ٸشٸنەن شەلەگٸ الىنىپ, ونىڭ ٸشٸندەگٸ سۇيىقتىق وسادكومەر ستاكانعا قۇيىلادى. قىستا جاۋعان قار بٶلمە تەمپەراتۋراسىنا دەيٸن ەرٸتٸلٸپ بارىپ ٶلشەنەدٸ. بۇل ىدىستا سۋدىڭ مٶلشەرٸ ەسەپتەلٸپ, قانشا مم جاۋعانى انىقتالادى.
ال قاردىڭ قالىڭدىعى باقىلاۋ پۋنكتەرٸندە ەكٸ تەسٸلمەن انىقتالادى. بٸرٸنشٸسٸ داتچيك ارقىلى اۆتوماتتى تٷردە جٷزەگە اسىرىلسا, ەكٸنشٸسٸندە دەستٷرلٸ تٷردە ەسەپتەلەدٸ. ول ٷشٸن باقىلاۋ ۋچاسكەسٸندە تەڭ قابىرعالى ٷشبۇرىش تٷرٸندە قار ٶلشەيتٸن ٷش تاقتايشا ورناتىلعان», - دەيدٸ سينوپتيكتەر.
