Soltústik Qazaqstan oblysynda jaýyn-shashyn mólsherin 16 meteostansa, 11 agropost pen sonsha gidropost baqylaidy. Sinoptikter jaýǵan jaýyn-shashyn mólsheriniń qalai eseptelinetinin aityp berdi, dep habarlaidy "Ult aqparat".
«Qazgidromet» RMK SQO filialy mamandarynyń aitýynsha, kópshilik bir qalada nemese aýylda, máselen 10 mm jańbyr jaýdy degendi estip, onyń qandai mólsher ekenin bile bermeidi. Al qysta jaýyn-shashyn mólsheri men qar qalyńdyǵyn shatastyrady.
Osy suraqtarǵa jaýap berý úshin sinoptikter áleýmettik jelidegi óz paraqshasynda 1 mm jaýyn-shashynnyń qansha bolatynyn qarapaiym mysaldarmen túsindirip berdi.
«Aspannan jaýatyn jańbyr, qar, burshaqty atmosferalyq jaýyn-shashyn dep ataidy. Onyń mólsheri millimetrmen esepteledi. Iaǵni jerge jaýǵan jaýynnyń sińip, býlanyp ketpegen qalyńdyǵy esepke alynady. 1 mm jaýyn-shashyn bir sharshy metr aýmaqqa tógilgen 1 litr sýǵa teń. Al 10 mm degen bir sharshy metrge tógilgen bir shelek sý», - deidi «Qazgidromet» mamandary.
SQO aýmaǵynda jaýyn-shashyn mólsherin 16 meteostansa, 11 agropost pen sonsha gidropost táýligine eki ret ólsheidi. Máselen jaýǵan jańbyr Tretiakov jaýyn-shashyn ólshegishi (osadkomer) dep atalatyn arnaiy qurylǵyda jinalady.
«Osadkomerdiń ishinen shelegi alynyp, onyń ishindegi suiyqtyq osadkomer stakanǵa quiylady. Qysta jaýǵan qar bólme temperatýrasyna deiin eritilip baryp ólshenedi. Bul ydysta sýdyń mólsheri eseptelip, qansha mm jaýǵany anyqtalady.
Al qardyń qalyńdyǵy baqylaý pýnkterinde eki tásilmen anyqtalady. Birinshisi datchik arqyly avtomatty túrde júzege asyrylsa, ekinshisinde dástúrli túrde esepteledi. Ol úshin baqylaý ýchaskesinde teń qabyrǵaly úshburysh túrinde qar ólsheitin úsh taqtaisha ornatylǵan», - deidi sinoptikter.
