20 мау, 2022 сағат 10:42

Қарағандыда тағы бір қаржы пирамидасының жолы кесілді

Қарағандыда тағы бір қаржы пирамидасының жолы кесілді. Бұл туралы Қаржылық мониторинг агенттігі хабарлады.

Пирамиданы ұйымдастырушы азаматтардан инвестиция тарту үшін WhatsApp-та топтар құрған. Қылмыстық схема қатысушылардың екі бағыт бойынша қаражатын тартудан тұрды.

"Біріншісі – жаңа қатысушыларды тарту арқылы салым сомасының 70%-ы көлемінде сыйақы төлеуге уәде беріп, 4 күннен 5 күнге дейінгі мерзімге азаматтардан инвестиция жинақтау. Екіншісі – «Cтандарт», «Vip» және «Premium» деген үш позицияға азаматтардан инвестиция тарту, 150 000 теңгеден 10 000 000 теңгеге дейінгі салымдар сомасында қаражат жинақтау.

Қылмыскер іс жүзінде кәсіпкерлік қызметпен айналыспаған. Салымдар мобильді банкинг арқылы қабылданды" - делінген хабарламада.

Аталған факті бойынша сотқа дейінгі тергеу басталды. Заң бұзған азаматша қаржылық пирамиданы құруына қатысты кінәсін мойындаған. Қазіргі уақытта жедел-іздестіру шаралары жүргізіліп жатыр.

ҚР ҚПК 201-бабына сәйкес өзге мәліметтер жария етілмейді.