Jelide jylqyshy Rahat Sársenovtyń videosy tarady, dep habarlaidy ult.kz.
«Rahat atamyzdy saǵynyp júrgen jandarǵa bir video salyp qoiaiyq. Atamyz aman, kóńil-kúii jaqsy. Sizderdiń ystyq yqylastaryńyz ben aq tilekterińizdi sezinip júr. as_nur_dent stomatologiiasy atamyzǵa arnaiy protez daiyndap jatyr. Buiyrsa, jaqynda jańa tisteri daiyn bolady», - dep jazdy jeli qoldanýshysy.
Aita keteiik, Aqtóbe oblysynyń Muǵaljar aýdanynda 100 jylqyny iemdendi degen aiyppen 7 jylǵa sottalǵan 60 jastaǵy jylqyshy Rahat Sársenov apelliatsiialyq sot sheshimimen bostandyqqa shyqty.
Rahat Sársenov 1993 jyldan beri jergilikti sharýanyń jylqysyn baǵyp kelgen. Biyl mamyrda Muǵaljar aýdandyq soty ony senip tapsyrylǵan bóten múlikti iemdendi degen aiyppen 7 jylǵa bas bostandyǵynan aiyrǵan. Sonymen qatar jábirlenýshi taraptyń shamamen 30 million teńge kólemindegi azamattyq talaby qanaǵattandyrylǵan.
Alaida sottalýshy tarap úkimge shaǵym túsirip, isti apelliatsiialyq tártippen qaita qaraýdy suraǵan.
Aqtóbe oblystyq sotynyń apelliatsiialyq alqasy isti qaita qarap, aiypty Qylmystyq kodekstiń 189-babynyń 4-bóliginen 1-bóligine qaita saralaǵan. Sot materialdary boiynsha 100 jylqynyń barlyǵyn iemdený faktisi dáleldenbegen. Apelliatsiialyq satyda bir jylqyǵa qatysty ǵana shyǵyn keltirilgeni anyqtalǵan.
Osyǵan bailanysty Rahat Sársenovke 7 jyldyq bas bostandyǵynan aiyrýdyń ornyna 6 aiǵa bas bostandyǵyn shekteý jazasy taǵaiyndalǵan. Keiin raqymshylyq týraly zań qoldanylyp, jaza merzimi 3 aiǵa qysqartylǵan. Tergeý izoliatorynda bolǵan ýaqyty esepke alynǵandyqtan, jaza óteldi dep tanylyp, jylqyshy sot zalynan birden bosatylǵan.
Sondai-aq materialdyq shyǵyn kólemi bastapqydaǵy shamamen 30 million teńgeden 600 myń teńgege deiin tómendetilgen.
Osylaisha, Rahat Sársenov tolyq aqtalǵan joq. Apelliatsiialyq sot 100 jylqyǵa qatysty aiypty alyp tastap, bir jylqyǵa qatysty isti ǵana dáleldengen dep tanyǵan.
