Osh oblysynyń Nookat aýdanynda tórt ai buryn kúmándi jaǵdaida kóz jumǵan 21 jastaǵy Aijanyl Alikaraevanyń máiiti qabirden qaita shyǵaryldy, dep habarlaidy ult.kz.
Marqumnyń kúieýiniń týystary onyń óz-ózine qol jumsap qaitys bolǵanyn aitqanymen, qyzdyń jaqyndary buǵan senbei, ólimine zorlyq-zombylyq sebep bolýy múmkin dep esepteidi.
Marqumnyń týystary istiń ádil tergelýin talap etip jatqanyn aityp otyr. Al politsiia komissiondyq sot-meditsinalyq saraptamanyń qorytyndysy boiynsha quqyqtyq baǵa beriletinin málimdedi.
Qaiǵyly oqiǵa biyl 19 aqpanda bolǵan. Arada tórt ai ótse de istiń sotqa jetpegenine narazy bolǵan marqumnyń ata-anasy alǵashqy sot-meditsinalyq saraptamanyń qorytyndysyna kúmán keltirip, máiitti qaita qazyp alyp, eksgýmatsiia jasaýǵa qol jetkizgen.
Marqumnyń ápkesi Ýýlcha Orýnbaevanyń aitýynsha, alǵashqy saraptama Aijanyldy «ekiqabat bolmaǵan» degen qorytyndy shyǵarǵan. Alaida anasy qyzy qaitys bolar aldynda júkti ekenin aityp súiinshi suraǵanyn, sondai-aq foto men beinejazbalar jibergenin aityp, alǵashqy saraptamanyń qorytyndysyna kúmán keltirip otyr.
Anasynyń aitýynsha, máiitti qaita qazyp alǵanja onyń jatyry men búiregi joq ekenin kórgen. Anasy ol aǵzalar qaida ketti? dep shyryldap otyr.
