Elordada ótken «Abai álemi» atty rýhani-taǵylymdyq is-sharada elimizge belgili ziialy qaýym ókilderi, abaitanýshylar men qala ákimdiginiń ókilderi bas qosty, dep habarlaidy QazAqparat.
Aldymen, Qazaqstan Jazýshylar odaǵynyń tóraǵasy, aqyn Ulyqbek Esdáýlet, elorda ákiminiń orynbasary Baqtiiar Máken bastaǵan sharaǵa qatysýshylar Abai Qunanbaiulynyń eskertkishine gúl shoqtaryn qoidy. Qurmanǵazynyń «Saryarqa» kúii oryndalǵannan keiin Baqtiiar Máken jinalǵandardy aitýly merekeli kúnimen quttyqtady.
«Uly Abai – qazaq halqynyń ulttyq bolmysy, bet-beinesi. Abai men qazaq búgin de egiz uǵymǵa ainaldy. Abai dańǵyly, Abai sózi, Abai qalyptastyrǵan adamdyq formýlasy, rýhani-ádebi mektebi osy kúni halyqtyń ainasyna, eldik murasyna negizdelip, qazaq sóziniń sinonimi sekildi úlken mánge ie boldy. Ýaqyt ótken saiyn Abai murasy týǵan eliniń ulttyq minberine shyǵyp, tuǵyrlanyp keledi. Abai Hákimniń qara sózderi – ǵibraty mol qazyna ekenin ýaqyt pen tarihtyń ózi dáleldedi. Uly Abaidyń qara sózderi búgin de urpaqtyń jadynda jańǵyryp tur. Biyldan bastap qazaq elinde bas aqynnyń 175 jyldyǵyna daiyndyq jumystary bastalyp ketti. QR Prezidenti Qasym-Jomart Toqaevtyń áleýmettik jeli arqyly Abai óleńderinen úzindi oqý estafetasyn zor qýanyshpen barlyq el qoldap, danyshpan Abaidyń 175 jyldyǵyn atap ótýi kerektigi jóninde bastama kóterdi. Qazir bul estafeta búkil respýblika deńgeiinde júrip jatyr», - dedi ol.
Osydan keiin ortaǵa Prezident Qasym-Jomart Toqaevqa Abai óleńinen úzindi oqý estafestasyn joldaǵan Láilim-Shyraq Erlanqyzy shyǵyp, Abaidyń «Ǵylym tappai maqtanba» óleńin oqyp berdi. Máneri erek oqýshynyń ónerine tánti bolǵan qala ákiminiń orynbasary B.Máken Láilim-Shyraqqa aqynnyń kitabynyń birin syiǵa tartty. Dástúrli ánshi Erlan Rysqali shyrqaǵan Abaidyń «Segizaiaǵy» jinalǵan jurtshylyqtyń kóńilin kóterip jiberdi.
«Qazaqtyń kemeńgeri, ǵulamasy, aqyl-oidyń qol jetpes munarasy dep aitatuǵyn Abai atamyzdy biz Paiǵambarǵa teńeimiz. Paiǵambar bolǵanda ol kisi dinniń Paiǵambary emes, dildiń, tildiń, poeziianyń Paiǵambary. Bizdiń ultymyz, qoǵamymyz sońǵy ǵasyrdyń kóleminde qandai jetistikterge qol jetkizse, sonyń barlyǵynda Abai atamyzdyń úlesi bar dep aitýǵa bolar edi. Parasat, paiym, adamgershilik, izgilik, iman, qaiyrymdylyq, meiirimdilik deitin izgi uǵymdardyń barlyǵy da ananyń sútimen, ákeniń tárbiesimen qosa osy Abaidyń jyrymen birge urpaqtyń qanyna enip, janyna daryp jatyr dep aitar edik», - dedi óz sózinde Qazaqstan Jazýshylar odaǵynyń tóraǵasy, aqyn Ulyqbek Esdáýlet.
U. Esdáýlet óz sózinde Abaidyń 175 jyldyǵyna úlken daiyndyq júrip jatqanyn tilge tiek etti.
«Abaidyń 175 jyldyǵyn toilaý jóninde Jarlyqqa qol qoiǵan Prezidentimiz Qasym-Jomart Kemelulynyń bir óziniń biliktegi basshylyq jumysyn osy Abaidyń basyna baryp ziiarat etkendei, Abaidyń aldyna baryp júgingendei, Abaidan bata alǵandai igi shara dep qabyldadyq. Abaidyń 175 jyldyǵy keń kólemde atalyp óteiin dep jatyr. Abaidyń shyǵarmalary álemniń 10 tiline jańadan aýdarylmaqshy. Burynǵy 125, 150 jyldyǵynda basqa tilde shyqqan kitaptary bar. Dese de, ol kezde Abaidy bir ǵana orys tilinen aýdarǵan. Endi árbir shet tilderine tikelei qazaq tilinen aýdarý qolǵa alynyp jatyr. Osy qalanyń da ákimine aldyn ala rahmet aitqymyz keledi. Osy sol jaǵalaýdan Qalamgerler alleiasy ashylaiyn dep jatyr. Qalamgerler alleiasy ainalyp kelgende aqyndar men jazýshylardyń alleiasy. Jazýshylar odaǵynyń osyndaǵy filialyna Shubardan eki qabattyq ǵimarat berilmek. Meniń oiymsha, qalamgerlerge kórsetilgen qurmet – Abai atamyzǵa kórsetilgen qurmet, Abaidyń izbasarlarlaryna kórsetilgen qurmet dep sanaimyn», - dep túidi sózin Ulyqbek Esdáýlet.
Aita ketsek, QR Prezidenti mamyr aiynda Abaidyń 175 jyldyq mereitoiy týraly Jarlyqqa qol qoiǵan bolatyn.
