Jyljymaityn múliktiń biryńǵai memlekettik kadastry jasalyp jatyr. Bul týraly búgin Úkimet otyrysynda QR Premer-Ministri Asqar Mamin aitty, dep habarlaidy "Ult aqparat".
«Taǵy bir mańyzdy másele – jer qatynastaryn tsifrlandyrý. Jyljymaityn múliktiń biryńǵai memlekettik kadastryn jasaý boiynsha aýqymdy jumys júrgizilip jatyr. Ol jer ýchaskeleri, qurylystar men ǵimarattar jónindegi derekterdi qamtityn bolady», - dedi ol.
Asqar Mamin Úkimet Parlamentke Jyljymaityn múliktiń biryńǵai memlekettik kadastry aiasynda memlekettik kórsetiletin qyzmetterdi tsifrlandyrý máseleleri jónindegi zań jobasyn engizgenin aitty.
«Zań jobasy biraz qyzmetterdi elektrondy formatqa aýystyrýǵa, jer ýchaskelerin berý tártibin ońailatýǵa, jalpy halyqqa kórsetiletin qyzmetterdiń sapasyn jaqsartýǵa múmkindik beredi», - dedi Úkimet basshysy.
