Foto: global-guide.org
Qazaqstanda bilik jańa Salyq kodeksi qabyldady. Oǵan sáikes keibir jaǵdaida jyljymaityn múlik satqanda tólenetin salyq 10-nan 15 %-ǵa deiin ósedi. Sonymen qatar mindetti túrde salyq tólenetin jaǵdailarǵa qoiylatyn talap ta ózgeredi. Bul týraly Ult.kz tilshisi Krisha.kz-ke silteme jasap habarlaidy.
Qashan salyq tóleý kerek
Siz jyljymaityn múlikke bir jyldan az ýaqyt ielik etip, ony qymbatqa satyp paida tapsańyz, salyq tóleýińiz kerek.
Kez kelgen jyljymaityn múlikti satqanda salyq salynady:
páter, jer úi, saiajai;
qoima;
turaq orny nemese garaj;
jer telimi.
Qazir salyq mólsherlemesi paidanyń 10 %-yn quraidy. Bul ereje 2025 jyldyń aiaǵyna deiin kúshinde bolady.
Satqan kezdegi salyq: jańa ereje
2026 jyldyń 1 qańtarynan bastap jańa Salyq kodeksi kúshine enedi. Ol jyljymaityn múlik satqanda salynatyn salyqqa eki negizgi ózgeris engizedi:
1. Ielik etý merzimi eki jylǵa uzarady
Endi jyljymaityn múlikti satqanda salyq tólemeý úshin, ol sizdiń menshigińizde keminde eki jyl bolýǵa tiis. Iaǵni, burynǵy bir jyldyq merzim eki jylǵa uzarady.
Mańyzdy: eki jyldyq ielik etý normasy tek 2026 jyldyń 1 qańtarynan bastap satyp alynǵan múlikke qoldanylady. Demek 2028 jyldyń 1 qańtarynan bastap salyq tólemeisiz.
2025 jyldyń aiaǵyna deiin baspana satyp alǵandar úshin burynǵy ereje saqtalady. Ielik etý merzimi bir jyldan assa salyq tólemeisiz.
2026 jylǵa deiin satyp alynǵan páterge burynǵy ereje qoldanylady. Bir jyldan astam ýaqyt ielik etseńiz salyq tóleýdiń qajeti joq.
2. Salyq mólsherlemesi 15 %-ǵa deiin ósedi
Jeke tabys salyǵynyń bazalyq mólsherlemesi ózgermeidi. Satyp alǵan kezdegi baǵa men satqandaǵy baǵanyń aiyrmashylyǵyn, iaǵni 10 %-yn tóleisiz. Biraq túsken paida óte joǵary bolsa, salyq 15 % bolady.
Jańa Salyq kodeksi boiynsha 8500 AEK-ten (2025 jyly shamamen 33.4 mln teńge) asqan paida óte joǵary dep esepteledi.
Paida 8500 AEK-ten assa, buǵan deiingi somaǵa 10 %, artyq bolsa 15 % mólsherleme qoldanylady.
Salyq esepteý mysaldary
Satý merzimi — 1 jyl, paida — 10 mln teńge
Salyq — 10 %, iaǵni 1 mln teńge
Satý merzimi — 2.5 jyl, paida — 40 mln teńge
Salyq — 0 teńge, sebebi ielik etý merzimi joǵary
Satý merzimi — 1 jyl, paida — 50 mln teńge.
34 mln teńgege deiin 10 % — 3.4 mln teńge.
Qalǵan 16 mln teńgege 15 % — 2.4 mln teńge.
Jalpy salyq — 5.8 mln teńge
Shetel azamaty ielik etý merzimine qaramastan 15 % tóleidi.
Salyqty qalai tóleý kerek
Aldymen deklaratsiia (270.00-nysan) tapsyrý qajet — múlik satylǵan jyldan keiingi jyldyń 15 qyrkúiegine deiin.
Salyq tóleý merzimi — 25 qyrkúiekke deiin (deklaratsiia tapsyrǵannan keiin 10 kún ishinde).
Salyq tóleý joldary:
— E-Salyq Azamat mobildi qosymshasy arqyly.
— eGov. kz saitynda.
— Salyq tóleýshiniń elektrondy kabinetinde.
— Óz aýdanyńyzdaǵy Memlekettik kirister basqarmasyna barýǵa bolady.
2026 jyldyń 1 qańtarynan bastap sán-saltanat salyǵy kúshine enedi. Menshigińizdegi múlikterdiń jiyntyq quny 450 mln teńgeden assa salyq tóleýge týra keledi. Bul quny 75 mln teńgeden asatyn qymbat kólik ielerine de áser etedi.
