Almaty oblysy Mejdýrechensk aýylynyń turǵyndary jol talǵamaityn kólikpen jylqyny ádeii basqan er adamnyń úii mańyna jinaldy, - dep habarlaidy Tengrinews.kz.
Áleýmettik jelide 18 shildede saǵat 22.00-de jol talǵamaityn kóligimen jylqyny ádeii basqan er adamnyń úiine shabýyl jasalǵany týraly aqparat paida boldy.
"Balalar úidi bireýler ainalyp júrgenin estipti, ázirge úidiń qorshaýy joq, terezeni qaǵyp, tas laqtyryp, esikterdi qaǵa bastady. 100-ge jýyq adam boldy. Qazir bári jaqsy, biraq adamdar ketip bara jatyp, úidi órtep jiberemiz dep aiǵailady", - deidi jazba avtory.
Almaty oblysy Politsiia departamenti mundai oqiǵa shynymen bolǵanyn rastady.
"Úilerdiń biriniń janyna jergilikti turǵyndardan shamamen 20-25 adam jinaldy. Habarlama aýdandyq politsiianyń kezekshi bólimine kelip túskennen keiin oqiǵa ornyna dereý patrýldik politsiia nariady men Ile AIIB basshylyǵy shyqty. Kelgen politsiia qyzmetkerleri jinalǵandarmen túsindirme áńgime júrgizdi, sodan keiin bári úiine tarady", - dedi quqyq qorǵaý organdary qyzmetkerleri.
Tártip saqshylary qoǵamdyq tártipti buzýǵa jol berilmegenin aitty.
Eske salaiyq, Almaty oblysynda jylqyny qasaqana basqan júrgizýshiniń videosy Jelide qyzý talqylanǵan edi. Kúdiktini politsiia ustaǵan. Quqyq qorǵaý organdarynyń málimetinshe, Mejdýrechensk aýylynyń 38 jastaǵy turǵyny aýyldastarymen janjal kezinde jylqyny basqan. Er adam óziniń áreketin baqshasynan 20-ǵa jýyq jaiylyp júrgen jylqyny shyǵarýǵa tyrystym dep túsindiripti.
Janýar aman qalǵan, biraq ieleri onyń jaraqaty bolǵandyqtan, baýyzdaýǵa májbúr bolǵan. Keiinirek júrgizýshi nege jazalanbaityny belgili boldy.
