QR Energetika ministrligi tórtinshi toqsanda dizel otynyn birja arqyly satyp bastamaqshy. Ortalyq kommýnikatsiialar qyzmetinde Munai tasymaldaý jáne óńdeý departamentiniń direktory Baýyrjan Sálimgereev osyndai málimet berdi, dep habarlaidy QazAqparat.
«Álemdik tájiribe janarmai baǵasyn belgileýdiń neǵurlym tiimdi jáne ashyq tetigi birjalyq saýda ekenin kórsetip otyr. Bizde birneshe jyldan beri munaidan suiytylǵan gaz elektrondyq saýda alańdarynda satylyp keledi. Janar-jaǵarmai boiynsha ministrlik Báselekelstikti qorǵaý jáne damytý agenttigimen birlesip, osy baǵytta josparly jumystar júrgizýde. Osy jyldyń naýryz aiynan bastap benzin osyndai jolmen satylyp otyr. Tórtinshi toqsanda dizeldi birjalyq saýda alańyna shyǵarý josparlanýda», - dedi Baýyrjan Sálimgereev.
Sondai-aq, ol oraq naýqanynda sharýalardy dizel otynymen qamtamasyz etý úshin Pavlodar munai-himiia zaýytyndaǵy jóndeý jumystary shegerilgenin málim etti.
«Aýyl sharýashylyǵy taýaryn óndirýshilerdi dizel otynymen qamtamasyz etý kezinde olqylyqtar bolmaý úshin Pavlodar munai-himiia zaýytynda josparly jóndeý jumystarynyń ýaqyty shegerildi. Bastapqyda jóndeý jumystaryn 24 shildede bastalyp, 24 kún boiy jalǵasady dep josparlanǵan bolatyn. Endi jóndeý aǵymdaǵy 1 qazanda bastalady. Biraq josparly jóndeý jumystaryn túbi bir júrgizbese bolmaidy. Óitkeni zaýyttyń odan ári qaýipsiz jumys isteýi jóndeý jumystaryna táýeldi», - dedi Baýyrjan Sálimgereev.
