Jyl sońyna deiin jańa 37 stýdentter jataqhanasy paidalanýǵa beriledi. Sonymen qatar sońǵy úsh jylda úshinshi áleýmettik bastama sheńberinde elimizde 85 jańa jataqhana iske qosylyp, 22 myńnan astam stýdent qonystandy, dep habarlaidy Bilim jáne ǵylym ministrliginiń baspasóz qyzmeti.
«Ministrlik Elbasynyń úshinshi áleýmettik bastamasyn iske asyrý aiasynda stýdentter jataqhanalaryn salý men qaita qurý qarqynyn jedeldetýdiń jańa tetikterin ázirledi. Atap aitqanda, jataqhanalar nysanaly qurylys jáne joǵary oqý oryndarynyń óz qarajaty esebinen, sondai-aq memlekettik-jekeshelik áriptestik qaǵidaty boiynsha salynady. Iaǵni, investorlar óz qarajatyna jataqhana salady, al ministrlik olarǵa memlekettik tapsyrysty ornalastyryp, stýdenttiń árbir jatyn ornyn tóleidi», — dep atap ótti QR BǴM Qarjy ortalyǵynyń prezidenti Asqar Ibraimov.
Mundai algoritm stýdenttik jataqhanalar sanyn edáýir arttyrýǵa jáne stýdentterdiń ómir súrý jaǵdailaryn jaqsartýǵa múmkindik berdi.
Qurylys jumystary Nur-Sultan qalasynda, Qyzylorda, Qaraǵandy, Shyǵys Qazaqstan, Jambyl jáne Mańǵystaý oblystarynda belsendi júrgizilip jatqanyn aita ketken jón.
Nur-Sultan jáne Almaty qalalarynda jeke investorlardy qosymsha yntalandyrý úshin memlekettik tapsyrys kólemin 47 AEK-ten 92 AEK-ke deiin ulǵaitý múmkindigi qarastyrylyp jatyr. Bul qalalarda jataqhanalarǵa asa qajettilik baiqalady. Sondai-aq qazirgi ýaqytta memlekettik tapsyrysty ornalastyrý merzimin 8 jyldan 5 jylǵa deiin qysqartý jóninde usynys ázirlendi.
Joǵary oqý oryndary múmkindikterine qarai óz qarajaty esebinen jataqhana salady. Keibir oqý oryndary turǵyn úi, jataqhanalar men qonaq úilerdi jalǵa alý arqyly stýdentterdiń turǵyn úige degen qajettiligin tómendetip jatyr. Búgingi tańda 13 JOO 5 myń stýdenti úshin jatyn oryndardy jalǵa aldy. Kelesi jyly 60-qa jýyq stýdent úii paidalanýǵa beriledi dep josparlanyp otyr.
