Qazaqstan úkimet basshysy Baqytjan Saǵyntaev janarmai tapshylyǵyn joiý boiynsha aldyn ala jumys ótkizýdi tapsyrdy, - dep habarlaidy kaz.tengrinews.kz.
Saǵyntaev Aqtóbe oblysynyń ákimi Berdibek Saparbaev pen energetika ministri Qanat Bozymbaevtan aimaqtaǵy suiyq ottynyń jetispeýshiliginiń aldyn alý sharalary týraly esep berýin surady.
"Sońǵy eki kún osy máselemen ainalysyp jatyrmyz. Keshe "Aqtóbemunaigaz" kompaniiasynan 800 tonna gaz aldyq. Gaz satýmen ainalysatyn mekeme qolda bar gazdy satpai otyr. Biz prokýratýraǵa jáne biýroǵa tapsyrdyq. Qazir qajetti sharalar qoldanylyp jatyr. Búginnen bastap bizdiń oblysta esh qiyndyq bolmaidy dep oilaimyn", - dedi aimaq ákimi úkimet otyrysy kezinde.
Qanat Bozymbaev Aqtóbe oblysynda akkreditatsiiadan ótken tórt gazben qamtamasyz etetin kompaniia baryn aitady.
"Oblysta ministrlikten 5 200 tonna gaz bólinedi. Muny kompaniialar alyp, oblysta satady. Naýryzda olar 5 myń tonna gaz alyp qoiǵan, biraq, ony qaida jibergenin tekserý kerek. Sol úshin Aqtóbe oblysyna eki laýazymdy tulǵany jiberdim", - deidi energetika ministri.
Saǵyntaev elimizde jylda janarmai tapshylyǵy bolyp turatynyn aitty.
"Bul másele biyl ǵana týyndap turǵan joq, jyl saiyn bolady: ne gaz joq, ne benzin joq. Bárin josparlaý kerek - gaz ben benzindi kim alady, qaida jóneltedi. Ákim aitqandai, janarmai oblysta emes, basqa jaqqa satylsa, shara qoldaný kerek. Muny osylai qaldyrýǵa bolmaidy, bári bitken soń shara qoldanýdyń ne keregi bar", - dep aiaqtady Saǵyntaev sózin.
Munyń aldynda Aqtóbede júrgizýshiler gaz toltyratyn janarmai beketterinde uzyn-sonar kezekte turýy májbúr ekeni habarlanǵan. Energetika basqarmasy munyń qoldan jasalǵanyn málimdedi.
Janarmai tapshylyǵy Aqtóbe oblysynda byltyr jazda da bolǵan. Osynyń saldarynan gaz qymbattap ketken edi.
