Elimizde jyl saiyn baqylaýǵa arnalǵan tehnikalyq quraldardyń kómegimen jol júrisi erejesiniń 1,5 mln-ǵa jýyq buzylýy anyqtalady. Bul týraly QR IIM Ákimshilik politsiia komiteti tóraǵasynyń orynbasary Serik Túsipov aitty, dep habarlaidy QazAqparat.
«Jol júrisi qatysýshylarynyń tártibin kúsheitýge Jol júrisi erejeleriniń buzylýyn avtomatty túrde tirkeýdi engizý septigin tigizip otyr. Qazir elimizde shamamen 11 myń kamera ornatylǵan. Olar ózderiniń tiimdiligin kórsetti. Respýblika boiynsha jyl saiyn baqylaýǵa arnalǵan tehnikalyq quraldardyń kómegimen Jol júrisi erejesiniń 1,5 mln-ǵa jýyq buzylýy anyqtalady. Bul jalpy Jol júrisi erejeleri buzylýynyń anyqtalǵan faktileriniń shamamen 40 paiyzyn quraidy. Atalǵan júie barlyq oblys ortalyqtary men qalalarda qoldanylady», - dedi ol Ortalyq kommýnikatsiialar qyzmetindegi baspasóz máslihatynda.
Onyń aitýynsha, ishki ister organdary jol infraqurylymynyń jai-kúiine de baqylaýdy júzege asyrady. Jyl basynan beri jol-tehnikalyq inspektsiiasy bólimsheleriniń kómegimen 388 shaqyrymnan astam jolǵa 20 myńnan astam tekserý júrgizildi. Nátijesinde jol júrisi qaýipsizdigine teris áseri bar jol-kólik infraqurylymyndaǵy 39,5 myń kemshilikti anyqtady. Atalǵan kemshilikterdi joiý boiynsha 19 myńnan astam uiǵarym shyǵaryp, joldy kútip ustaýǵa jaýapty 2,5 myńǵa jýyq laýazymdy tulǵaǵa aiyppul saldy.
Atalǵan baspasóz máslihaty barysynda ol elimizde 2020 jyldyń 9 aiynda 8 933 jol-kólik apaty oryn alyp, saldarynan 1 265 adam qaza tapqanyn, 11 780 adam jaraqat alǵanyn aitqan edi.
