QR Parlamenti Senatynyń depýtaty Áli Bektaev respýblika jerlerindegi topyraq sapasy jóninde Premer-Ministr Asqar Maminge saýal joldady, dep habarlaidy QazAqparat.
Senator biylǵy qýańshylyq agroónerkásiptik keshendi damytý baǵdarlamalarynyń álsiz jaqtary men kemshilikterin anyqtady dep sanaidy. Áli Bektaev ǵylymi negizdelgen agrotehnologiialardyń engizilmeýine, topyraqty melioratsiialaý jáne jerdi sýarý rejiminiń saqtalmaýyna bailanysty aýyl sharýashylyǵy jerleriniń qunarlylyǵy jyldan jylǵa tómendep kele jatqanyna alańdaýly.
«Elimizdiń Ekologiia, geologiia jáne tabiǵi resýrstar ministrliginiń málimetinshe, sýarmaly jerler men ondaǵy egis alqaptarynyń degradatsiiasy 10%-ǵa, orman jerleri 8%-ǵa jetip otyr. Aýyl mańyndaǵy jerlerdi baqylaýsyz, júiesiz paidalaný saldarynan elimizdiń basty bailyǵy – jaiylymdardyń ózi 20-60% aralyǵynda tozǵan», - dedi Áli Bektaev Senattyń búgingi otyrysynda.
Depýtattyń aitýynsha, topyraq sapasyn saqtaý boiynsha memlekettik saiasattyń bolmaýynan egis alqaptary men jem-shóp alqaptary da qysqarýda. Bul, óz kezeginde, jalpy agrarlyq sektordyń damýyna teris áser etedi.
«1990 jyldan beri aýyl sharýashylyǵy daqyldary egiletin alqap 40%-ǵa kemip, al mal azyǵyn óndiretin jerler 70%-ǵa qysqarǵan. Sýarmaly jerlerdiń onnan bir bóligi qunarlylyǵyn joǵaltqan. Meliorativtik jaǵdaiynyń tómendeýinen 15 paiyzy paidalanýdan shyqqan. Jyl saiyn 18 mln gektar egistik jerler jel jáne sý eroziiasyna shaldyǵýda», - dedi senator.
Áli Bektaev 2021-2024 jyldarǵa arnalǵan aýyl sharýashylyǵyn damytý jónindegi memlekettik baǵdarlamaǵa topyraqty saqtaý salasyndaǵy memlekettik saiasatty qalyptastyrý úshin birqatar naqty sharalardy engizýge shaqyrdy.
Senatordyń pikirinshe, Qazaqstannyń aýyl sharýashylyǵy alqaptarynyń topyraǵyna agrohimiialyq zertteýler júrgizý jáne olardy qalpyna keltirýdiń kezeń-kezeńimen josparyn qalyptastyrý mańyzdy.
«Sonymen birge, topyraq sapasynyń ózgerýin ǵana emes, jalpy ekologiialyq jaǵdaidy únemi baqylaityn aqparattyq júielerdi qalyptastyrýǵa memlekettik qoldaý kórsetý mańyzdy. Osy oraida tsifrlandyrý men jer resýrstaryna kosmomonitoring júiesi masshtabyn keńeitý qajet», - deidi Á. Bektaev.
