Jyl basynan Qazaqstanda resmi dilerler 86 myńnan astam avtomobil ótkizdi. Bul týraly «QazAvtoÓnerkásip»ZTB basqarma tóraǵasynyń orynbasary Artýr Miskarian Telegram kanalynda jazdy, dep habarlaidy QazAqparat.
«Ótken aida qazaqstandyqtar avtosalondarda 10 517 tehnika (jeńil avtokólik, avtobýs, júk kóligi, arnaiy tehnika) satyp aldy. Bul kórsetkish 2020 jylǵy qyrkúiek aiyna qaraǵanda 12 paiyzǵa artyq. Álemdik avtokólik naryǵyndaǵy usynys tapshylyǵy kólik baǵasyna, al logistikalyq problemalar - óndirýshiler men dilerlerdiń mindettemesin ýaqytyly oryndalmaýyna áser etip otyr. Kólikti jetkizý merzimi marka, model jáne avtokóliktiń komplektatsiiasyna qatysty qubylyp turady. Ortasha alǵanda, klient pen avtosalon arasynda shartqa qol qoiǵannan bastap, kólikti tabystaǵanǵa deiin 3-ten 6 aiǵa deiin ýaqyt kerek», - deidi Miskarian.
Qyrkúiek aiyndaǵy TOP-5 brend: Chevrolet – 2 338 kólik, Hyundai – 1 947, Toyota – 1 214, KIA – 855, sondai-aq LADA-nyń 823 kóligi satyldy.
«LADA-ny qospaǵanda, alǵashqy bestiktegi brendterdiń satylymy negizinen turaqty bolyp tur. Ótken jyldyń qyrkúiek aiymen salystyrǵanda LADA kólikteriniń satylymy 61 paiyzǵa tómendedi», - dedi ol.
Biylǵy 9 aidaǵy TOP-5 brendtiń qataryna: Chevrolet, (22 383 kólik), Hyundai (17 576), Toyota (10 404), KIA (6 993), LADA (5 660 kólik) endi.
«Jyl basynan beri resmi dilerler jalpy 86,5 myń avtomobil ótkizip, osy arqyly naryq 36 paiyzǵa ósti. Qazirgi tapshylyq pen baǵa ósimine qaramastan, suranys turaqty bolyp tur», - dep atap ótti Miskarian.
