Sybailas jemqorlyqqa qarsy qyzmet jyl basynan beri 772 isti sotqa joldaǵan. Sondai-aq kinási dáleldengen 570 adam sottalǵan, dep habarlaidy QazAqparat.
Sybailas jemqorlyqqa qarsy is-qimyl agenttiginiń asa mańyzdy ister boiynsha tergeýshisi Daniiar Begaidarov Antikor aqparat alańynda osyndai málimet keltirdi.
«Sybailas jemqorlyqqa qarsy qyzmet 2021 jyldyń ótken kezeńinde 1038 sotqa deiingi tergep-tekserýdi tirkedi, onyń 772-si sotqa jiberildi. Atalǵan qylmystyq ister boiynsha 135 laýazymdy tulǵa ustaldy, 122 adamǵa qatysty «kúzetpen ustaý» jáne 29 adamǵa qatysty «úiqamaq» bultartpaý sharalary qoldanyldy», - dedi agenttiktiń asa mańyzdy ister boiynsha tergeýshisi.
Onyń sózine qaraǵnada, jyl basynan beri sybailas jemqorlyq qylmystyq ister boiynsha 570 adam sottalǵan. Onyń ishinde 138 adam para alǵany úshin, 237 adam para bergeni úshin, 12 adam deldaldyq úshin, 78 adam alaiaqtyq úshin, 42 adam urlyq úshin, 42 adam laýazymdyq ókilettikterin teris paidalanǵany úshin, 11 adam bilikti nemese laýazymdyq ókilettikterin asyra paidalanǵany úshin jaýapqa tartylǵan.
«Bas bostandyǵynan aiyrýǵa – 172 adam, bas bostandyǵyn shekteýge – 56 (qalǵandary shartty merzimge jáne jazasyn óteýdi keiinge qaldyra otyryp - 8), para somasynan birneshe eselengen aiyppuldarǵa 330 adam tartyldy. Aiyppuldardyń jalpy somasy shamamen 1,9 mlrd teńge boldy», - dedi Daniiar Begaidarov.
