Densaýlyq saqtaý vitse-ministri Ajar Ǵinaiat jyl basynan beri halyqty vaktsinalaýǵa qansha aqsha bólingenin aitty, dep habarlaidy "Ult aqparat".
«2021 jylǵa vaktsina satyp alý úshin 95 mlrd teńgeden astam qarajat josparlanǵan. Sonyń 61 mlrd teńgesi vaktsinalar men ony egýge qajet shprits alý úshin jumsaldy. Sonymen qatar, statsionalardaǵy naýqastarǵa kómek kórsetip jatqan meditsina qyzmetkerlerin yntalandyrý úshin berilip jatqan qosymsha aqsha bar. Onyń mólsheri ótken ailarda 89 mlrd teńge boldy. Ol ai saiyn meditsina qyzmetkerleriniń eńbekaqysyna qosymsha berilip otyr», - dedi vitse-ministr.
Vedomstvo ókili naýqastardy emdeýge qansha qarajat jumsalǵanyn da atap ótti.
«Sonymen qatar qarjy koronavirýs aýrýlaryn emdeýge, onyń aldyn alý sharalaryna bólinip jatyr. Respýblikalyq biýdjetten koronavirýs infektsiiasy rastalǵan naýqastardy emdeýge 80 mlrd teńge josparlanǵan. Qazir sonyń shetinen árbir meditsinalyq uiymǵa bólinip otyr. Saqtandyrý qorynan koronavirýsy dáleldenbegen nemese koronavirýs pnevmoniiasymen aýyrǵan adamdardy emdeý úshin 17 mlrd teńgeden astam qarajat qarastyrylǵan», - dedi Ajar Ǵinaiat.
