Jyl basynan beri qazaqstandyqtarǵa 1,5 trln teńgeden astam somaǵa zeinetaqy tólendi. Bul týraly "Ult aqparat" Eńbek ministrligine silteme jasap habarlaidy.
2021 jyldyń qańtar-shilde ailarynda respýblikalyq biýdjetten bazalyq zeinetaqy tóleýge 478, 9 mlrd teńgeden astam qarjy, yntymaqty zeinetaqy tólemderine 1 083 mlrd teńge baǵyttaldy.
2021 jyldyń shilde aiynda respýblikalyq biýdjetten zeinetaqy tólemderine 222,2 mlrd teńge, onyń ishinde bazalyq zeinetaqy tóleýge – 68,1 mlrd teńge, yntymaqty zeinetaqy tóleýge – 154,1mlrd teńge bólindi.
2021 jyldyń 1 tamyzyndaǵy jaǵdai boiynsha zeinetkerler sany 2 mln 238 myń adamdy quraidy.
Zeinetaqy tólemderiniń ortasha mólsheri (onyń ishinde bazalyq zeinetaqyny qosqanda) 2021 jyldyń 1 tamyzyndaǵy jaǵdai boiynsha 99 921 teńgeni qurady.
Eske salaiyq, 2018 jylǵy 1 shildeden bastap memlekettik bazalyq zeinetaqy tólemi ár alýshyǵa onyń zeinetaqy júiesindegi tájiribesin eskere otyryp, jeke taǵaiyndalady.
Bul rette zeinetaqy júiesindegi eńbek ótiline 1998 jylǵy 1 qańtardaǵy jaǵdai boiynsha yntymaqty júiede jumys istegen ýaqyty, sondai-aq mindetti zeinetaqy jarnalary tólengen kezeńder qosylady.
Sonymen, eger zeinetaqy júiesindegi jumys ótili 10 jyl nemese odan az bolsa, sondai-aq eger múlde joq bolsa, bazalyq zeinetaqy eń tómengi kúnkóris deńgeiiniń 54%-yn quraidy, sodan keiin 10 jyldan asqan ár jyl úshin onyń mólsheri 2%-ǵa artady. Mysaly, eger siz 20 jyl qatyssańyz, bazalyq zeinetaqy kúnkóris deńgeii qunynyń 74%-yn, 30 jylda kúnkóris qunynyń 94%-yn quraidy. 33 jáne odan da kóp jyl jumys ótili bolsa, kúnkóris deńgeiiniń 100%-y mólsherinde joǵary belgilenedi.
Eger bir ai ishinde Biryńǵai jinaqtaýshy zeinetaqy qoryna MZJ birneshe ret jasalsa, jinaqtaýshy júiege qatysý merzimi bir aidy quraidy.
Osylaisha, mindetti zeinetaqy jarnalary neǵurlym turaqty jáne tolyq salynatyn bolsa, zeinetaqy jasyna jetkende bazalyq zeinetaqy tólemderiniń mólsheri soǵurlym kóp bolady.
Óz kezeginde, jasyna bailanysty zeinetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 ai qajet) jáne zeinetkerlikke deiingi kezeńde alynǵan ortasha ailyq tabysqa bailanysty bolady.
