Sońǵy táýlikte Covid-19 infektsiiasynyń 112 jaǵdaiy tirkeldi. Bul týraly elorda ákimdiginiń baspasóz ortalyǵynda ótken onlain brifingide aityldy, dep habarlaidy QazAqparat.
«Sońǵy táýlikte Covid-19 infektsiiasynyń 112 jaǵdaiy tirkeldi. Jyl basynan beri elordada koronavirýs infektsiiasymen 7 603 adam aýyrdy. Qańtarda 3 763 adam, aqpanda 2 811, naýryzda 1 029 adam aýyrdy. PTR testiniń teris nátijesimen Covid-19 bolyp aýyrǵandardyń sany – 96. Qańtar aiynda 55, aqpan aiynda 28, naýryz aiynda 13 jaǵdai tirkeldi», - deidi Nur-Sultan qalasynyń bas memlekettik sanitarlyq dárigeri Sarhat Beisenova.
Onyń aitýynsha, naýqastarmen bailanysta bolǵan adamdardyń úles salmaǵynyń dinamikalyq ósý kórsetkishi aqpan aiynda 45%, naýryz aiynda 49% bolǵan.
«Bul - adamdar aýrýdyń aldyn alý sharalaryn saqtamaitynyn bildiredi. Qazirgi ýaqytta qalada 912 juqtyrý oshaǵy bar. Onda naýqaspen bailanysta bolǵan 2 500 adam baqylaýda», - deidi ol.
