2020 jyldyń basynan beri Nur-Sultanda balalardyń terezeden qulaý jaǵdaiy 28 ret tirkelgen. Bul týraly Nur-Sultan qalalyq Tótenshe jaǵdailar bóliminiń bastyǵy Erkin Otarǵalymuly onlain brifing barysynda aitty, dep habarlaidy QazAqparat.
«Jalpy, 2-7 jas aralyǵyndaǵy balalarda terezeden qulaý qaýpi joǵary. Balalardyń terezelerden qulaýynyń basty sebebi - olardy ashyq tereze aldynda qaraýsyz qaldyrý. Ókinishke qarai, úide eshkimniń qadaǵalaýynsyz otyrǵan bala aýlada oinap júrgen balalardyń daýysyn estidi. Daýysqa eleńdegen bala terezege qarai barady. Osyǵan orai, qurmetti ata-analar, men sizderge birneshe usynys aitqym keledi. Birinshiden, balanyń terezeden qulap ketýine jol bermeý úshin olardy qaraýsyz qaldyrýǵa múldem bolmaidy. Ekinshiden, jihazdy bala terezege ózdiginen kóterilip shyǵa almaityndai etip ornalastyrý qajet. Úshinshiden, masadan qorǵaityn tor balany terezeden qulap ketýden saqtai almaitynyn este saqtaý kerek. Kelesi másele - terezege buǵat ornatý kerek. Sonymen qatar, balalarǵa tereze aldynda oinaýǵa bolmaityny týraly aitý kerek. Qurmetti ata-ana, eger siz osy erejelerdi saqtaityn bolsańyz, balańyzdyń ómirin saqtap qala alasyz», - dedi Erkin Otarǵalymuly.
Onyń aitýynsha, 2018 jyldan beri elordada balalardyń terezeden qulaý oqiǵasyna qatysty 70 jaǵdai tirkelgen. 16 bala terezeden qulap mert bolsa, 54 bala jaraqat alǵan. Tek biyldyń ózinde osyndai 28 jaǵdai tirkeldi.
«Qurylys alańdarynda eresekterdiń biiktikten qulap ketý jaǵdaiy sany ósip keledi. 2020 jyldyń basynan beri osyndai 14 oqiǵa tirkeldi. 14 qyrkúiekte kiltin úiinde umytyp ketken astana turǵyny páterge parapet arqyly kirmek bolyp, qulap ketken. Altynshy qabattan qulaǵan er adam oqiǵa ornynda kóz jumdy», - deidi ol.
