2021 jyldyń eki aiynda Qazaqstan 10,75 mln tonna munai eksporttady. Bul týraly búgin Úkimet otyrysynda QR Energetika ministri Nurlan Noǵaev aitty, dep habarlaidy "Ult aqparat".
«Esepti kezeńde munai jáne kondensat óndirý kólemi 13,8 mln tonnaǵa jetti. Osy jylǵy qańtar-aqpan ailarynyń jospary 101,1 paiyz oryndaldy. Onyń ishinde, munai-gaz salasyndaǵy iri kompaniialar boiynsha kórsetkishter tómendegidei: Teńiz jobasynda atalǵan kezeńde 4,3 mln tonna munai óndirildi. Bul esepti aidyń josparyna - 104,5 paiyz. Soltústik Kaspii jobasy – Qashaǵanda munai óndirý kólemi 2,4 mln tonnany qurady. Iaǵni qańtar-aqpan ailarynyń jospary 103,4 paiyzǵa oryndalyp otyr. Qarashyǵanaq jobasynyń kórsetkishi 2,1 mln tonnany qurap, jospar 100 paiyz oryndaldy», - dedi 2021 jyldyń qańtar-aqpanynda eldiń áleýmettik-ekonomikalyq damýy jaiynda baiandaǵan ministr.
Onyń atap ótýinshe, búgingi tańda álemdik munai naryǵy men munaidyń baǵa belgilenimderiniń birte-birte qalpyna kelý úrdisi baiqalyp otyr.
«biylǵy 86 mln tonna jospardyń oryndalatyndyǵy kútiledi. Ministrlikpen atalǵan jospardy oryndaý maqsatynda birqatar is-sharalar atqarylýda. Sońǵy kelissózderge sáikes OPEK+ aiasynda Qazaqstan Respýblikasynyń mindettemesi munai óndirý kólemin shekteýin 17-den 15 paiyzǵa deiin túzetildi. Esepti kezeń ishinde 10,75 mln tonna munai eksporttaldy. Osy jylǵy qańtar-aqpan ailarynyń jospary 100 paiyz oryndaldy», - dedi Nurlan Noǵaev.
