Densaýlyq saqtaý ministri Ajar Ǵiniiat gastroenterolog dáriger Iýrii Shýmkovtyń ólimine qatysty pikir bildirdi, dep habarlaidy Sputnik Qazaqstan.
Ministr qoǵam bilikti mamannan aiyrylǵanyn aitty.
"Ózimniń jáne ministrliktiń atynan dárigerdiń otbasy men jaqyndaryna qaiǵyryp kóńil aitamyn. Beibit zamanda meditsina qyzmetkerlerine kózqarasy burys patsientterdiń qolynan dárigerlerdiń qaza taýyp jatqany úlken tragediia", - dep jazdy ministr áleýmettik jelidegi paraqshasynda.
Ajar Ǵiniiat dárigerdiń otbasynyń qaiǵysyn sózben aityp jetkizý múmkin emes ekenin atap ótti. Úsh balasy jetim, ata-ana uldarynsyz qaldy, dedi ol.
"Otandyq meditsina gastroenterologiia salasynyń damýyna úles qosyp, júzdegen naýqasty emdegen bilikti dárigerden aiyryldy", - dep qosty Ǵiniiat.
Ministr, tergeý ádil júrgizilip, qylmysker tiisti jazasyn alady degen senimin bildirdi.
Esterińizge sala keteiik, belgili gastroenterolog Iýrii Shýmkov 4 sáýir tańerteń Almatynyń Bostandyq aýdanynda qaza boldy. Atalǵan derek boiynsha qalanyń politsiiasy Qylmystyq kodekstiń 99-baby ("kisi óltirý") boiynsha tergeý bastalǵanyn rastady.
Tergeý qupiiasy saqtalatynyn eskerip, Almaty politsiiasynyń baspasóz qyzmeti tolyq málimetti ashpady.
Qylmys jasalǵannan keiin kúdikti birden taksige otyryp, qashyp ketken. Kóshedegi beinebaqylaý kameralarynyń kómegi arqyly jedel ýákilder kólik markasy men memlekettik nómirin anyqtap, kameralar arqyly onyń qozǵalys baǵytyn qadaǵalady.
Politsiia jasaǵy kólikti Shańyraq shaǵyn aýdanynda ustady. Kúdikti kólikte bolǵan. Qazir ustalǵan adamǵa qatysty qajetti tergeý amaldary júrgizilip jatyr.
