Búgin Elordada Elbasy N.Nazarbaev «Júz jańa esim» jobasynyń ekinshi kezeńi jeńimpazdarymen júzdesti.
Memleket basshysy Qazmedia ortalyǵynda ótken jiynda elimizdiń ár túkpirinen kelgen joba qatysýshylarynyń jetistikke jetý jolymen tanysty.
Alǵash bolyp sahnaǵa kóterilgen «Pifagor» kompaniialar tobynyń jetekshisi Asan Joldasov 10 jylda 10 myń balany tárbielegenin atap ótti.
Oqýshy kezinen-aq matematikadan respýblikalyq, halyqaralyq olimpiadalarǵa qatysyp, júldeli oryndarǵa ie bolǵan ol 19 jasynda óz mektebin ashqan.
«Búginde «Pifagor» úlken kompaniiaǵa ainaldy. Almaty, Astana jáne Taraz qalasyndaǵy mektepterimizde 136 muǵalim jumys isteidi, 1500 talantty bala bilim alyp jatyr», - deidi Asan Joldasov.
Asannyń aitýynsha, «Pifagor» mektebiniń shákirtteri el quramasynyń jarty bóligin quraidy. Kóbisi halyqaralyq olimpiadalarda bas júldege ie bolyp, álemdik arenada el namysyn qorǵap júr.
Úshinshi synypta oqyp júrgende transformatordyń toǵyna túsip, bir qoly men bir aiaǵynan aiyrylǵan Erjannyń ómir joly múlde bólek. Taǵdyr tálkegine tússe de moiymaǵan ol júzýdi úirenip, biik belesterdi baǵyndyrǵan. Erjan búgingi tańda xalyqaralyq dárejedegi sport sheberi, Álem kýbogynyń tórt dúrkin iegeri, Aziia oiyndarynyń eki márte jeńimpazy atanǵan.
«Sport meniń ómirimdi túbegeili ózgertti. Qaisar minezimniń arqasynda eshqandai qiynshylyqtarǵa qaramai, aldyma maiqsat qoiyp, kúnde jattyqtym. Búginde úlken jetistikterge jetip otyrmyn. Indoneziia eli Jakarta qalasyna ótken jazǵy Paraaziia oiyndarynda qos altyn medal enshiledim. 50 metrdi 31 sekýndta baǵyndyrsam, 100 metrdi 1 minýt 8 sekýndta baǵyndyrdym. Bul – meniń jeke rekordym. Endigi maqsatym - Tokio Olimpiadasynda chempion ataný», - deidi Erjan Sálimgerev.
Halyqaralyq fotojýrnalist ári analitik Nazgúl Kenjetaidyń jankeshti jumysy, izgilik ańsaǵan asqaq armany kópshilik kóńilin tolqytty. 23 jasar qyzdyń áskeri jýrnalistika jolyndaǵy batyl qadamdary shet elderde joǵary baǵalanyp, úzdik jobalardyń qataryna qosylǵan.
Nazgúldiń negizgi maqsaty – otansyzdyqtyń ne ekenin kórsetý, beibitshiliktiń qanshalyqty baǵaly ekenin jetkizý. Álemniń ár túkpirinde bolyp jatqan qaqtyǵystardy sóz etken ol, Taiaý Shyǵystaǵy talqandalǵan taǵdyrlardy da tilge tiek etti.
«Stýdenttik kezden bastap osy máselelerdi jaqynyraq zertteýdi qolǵa aldym. Adamzattyń basyna kelgen bul problemany zertteý arqyly teńizde bir tamshy bolsam da, álemge, adamzatqa kómegim tise eken deimin. Men emes, mamandyǵym meni tańdady. Osylaisha, jas maman úshin jaýapkershiligi óte aýyr jolǵa shyqtym. Osy jolda «Jánatta azyq kóp pe?» dep suraǵan sábidi kórdim... Ózendei aǵyp, joq bolyp ketken bir memleket kórdim... Bosyp ketken xalyqty kórdim... Bairaǵy jerde taptalǵan el kórdim jáne sol bairaǵyn qorǵai almaǵan er kórdim... Osynyń bárin kórdim de, qolymnan kelgenshe álemge kórsetýge tyrystym. Maqsatym otansyzdyqtyń ne ekenin kórsetý edi», - dep aǵynan jaryldy Nazgúl.
Al, dáriger-reprodýktor Almaz Ibragimov ómirindegi bir oqiǵanyń bolashaǵyna qalai áser etkenin aityp berdi. Onyń aitýynsha, Qaraǵandy meditsina akademiiasyn oqyp júrgen kezde hirýrg boldy armandaǵan. Alaida, sońǵy kýrsta jas otbasymen birge páter jaldap turǵan kezi onyń ómiriniń basqa arnaǵa burylýyna septigin tigizgen. Naqtyraq aitqanda, úilengenderine 3 jyl bolǵan jarasymdy jas otbasy bala súie almaǵan. Dárigerlerge baryp qansha ret tekserilip, emdelse de balaly bolý baqytyna jete almai-aq qoiǵan. Bul jaǵdaidan keiin Almaz jas otbasyǵa kómektesýdi oilap, bedeýlik máselesin zertteýdi qolǵa alady.
Tipti, Sechenov atyndaǵy Máskeý meditsina akademiiasyna oqýǵa attanyp, kúrdeli salanyń sońyna túsedi. Máskeý akademiiasyn bitirip kelgennen soń «Ekomed» atty bedeýlikti emdeýmen ainalysatyn arnaiy klinikaǵa jumysqa ornalasady. Eýropa men AQSh-ta bilimin jetildirip, tájiribesin tolystyra túsedi. Osylaisha, dáriger-reprodýktorǵa ainalady.
«Búgingi kúni «Astana Ekomedtegi» áriptestermen birge 5 myńnan astam sábidiń dúniege keýine sep boldyq. Qazir kún saiyn 1-2 bala ómirge keledi. Elimizdiń aimaqtarynda 9 filial jumys isteidi. «Ekomed» kompaniiasynyń arqasynda 12 myń bala dúniege keldi», - deidi Almaz.
Júz jańa esimniń qataryna qosylǵan aqyn Maqpal Mysa: «Biz Táýelsizdik týdyrǵan esimdermiz. Alashtyń rýhy bolyp qainaǵan qara qazannyń sýy sarqylǵan joq. Búginde men siiaqty qalam terbep júrgen jastar – sol qasietti sýdyń bir-bir móldir tamshysy» dep sóz bastap, shyǵarmashylyq jolyna toqtalyp ótti.
Búginde aqynnyń óleńderi álemniń birneshe tiline aýdarylyp, sol elderdiń antologiialyq jyr-jinaqtarynda jaryq kórgen. Ózi de ózge tildegi óleńderdi qazaq tiline tárjimalaýmen ainalysady eken.
Sondai-aq ol QR Tuńǵysh Prezidenti – Elbasy qory uiymdastyrǵan «Altyn tobylǵy» respýblikalyq baiqaýynda Bas júldege ie bolǵan.
«Munyń barlyǵy ózińiz kóshin bastaǵan qazaq jurtynyń qasietti Táýelsizdiginiń arqasy dep bilemin. Búgingidei adamzat balasynyń aqyl-oiy alamanǵa túsken zamandy bizdiń ádebietimizdiń kórkeiip, kemeldenýi asa mańyzdy. Jan tazarmai dúnie tazarmaidy. Adamdar bir-biriniń qadirine jetip, baǵalai bilse, jaqsy kórip baqyt syilasa. Ómir degen osy bir adami qundylyqtardan turady», - deidi jas aqyn.
Joba barysynda uiymdastyrýshy tarap aqynnan patriottyq taqyrypta óleń oqýyn suraǵan eken. Alaida ol Elbasynyń ruqsatyn surai otyryp, mahabbat jaily óleńin oqyp berdi.
Maqpal Mysa «Alystama» dep atalatyn óleńin oqyp, kópshiliktiń ystyq yqylasyna bólendi.
Memleket basshysy sóilegen sózinde Qazaqstannyń memlekettiligi men egemendigin nyǵaitý jolynda jastarymyzdyń áleýetin paidalanýdyń mańyzdy ekenin atap ótti.
«Bárińiz de – táýelsizdiktiń perzentisizder. Biz – babalarymyzdyń armanyn júzege asyrǵan urpaqpyz. Endi sizderdiń ýaqyttaryńyz keldi. Muny umytpaýǵa tiissizder», – dedi Elbasy.
Elbasy jobaǵa qatysýshylardyń jetistikterine toqtalyp, jastardyń tulǵalyq jáne kásibi turǵydan ósýi úshin óz múmkindikteri men ýaqytyn tiimdi paidalanýdyń mańyzdy ekenin atap ótti.
Nursultan Ábishuly túrli saladaǵy jetistikterge qatysty túrli mysaldar keltirip, elimizdi damytý isindegi belsendi jastardyń róline toqtaldy.
Sonymen qatar «Júz jańa esim» jobasynyń aldaǵy ýaqytta jalǵasyn tabatynyn aita kelip, bul jobanyń mán-mańyzyn tilge tiek etti.
Jiyn sońynda Nursultan Nazarbaev jobaǵa qatysýshylardyń bárine rizashylyq bildirip, Qazaqstan jastaryn elimizdi odan ári damytý isine belsendi atsalysýǵa shaqyrdy.
Sonymen, "Qazaqstannyń 100 jańa esimi" jobasynyń jeńimpazdary tizimin nazarlaryńyzǵa usynamyz (2018 j.):
1. Larion Lian
2. Asan Joldasov
3. Bolat Sultanqulov
4. Chingiz Shashkin
5. Aidos Sailyǵaraev
6. Aleksandr Pýpenko
7. Álibek Álmadiev
8. Batyrjan Smaqov
9. Almaz Ibragimov
10. Ivan Krepak
11. Nýrhat Jakiev
12. Álibek Ibraev
13. Dáýren Ádilbai
14. Sýhrab Japarov
15. Tamila Mýridova
16. Erdos Tólegenov
17. Serik Nurkenov
18. Maia Jumanbekova
19. Ámir Qýat
20. Maqpal Tajmaǵambetova
21. Mynjylqy Berdiqojaev
22. Nikita Amoskin
23. Bahtiiar Bazarbekov
24. Aidos Esmaǵambetov
25. Ǵalym Nurlanov
26. Erjan Sálimgereev
27. Anvara Sadykova
28. Nazgúl Kenjetai
29. Evgenii Chýrikov
