QR Prezidenti Ákimshiligi Basshysynyń birinshi orynbasary Dáýren Abaev «Ashyq dialog» alańynda Memleket basshysy Qasym-Jomart Toqaevtyń jemqorlyqpen kúres týraly sońǵy málimdemesine qatysty pikir bildirdi, dep habarlaidy QazAqparat.
Apta ishindegi basty saiasi aqparattarǵa taldaý jasalǵan baǵdarlamada Dáýren Abaev aram oiy bolmai jemqorlyq qatelikke boi aldyrǵan memlekettik qyzmetshige qylmystyq jaza qoldanbaý týraly QR Prezidentiniń pikirine túsinik berdi.
«Bul máseledegi memleket saiasatyn tunyq túsindirý úshin maǵan kózge kórineý jaittardy aitý kerek siiaqty. Qazir bilik memlekettik basqarýdyń sapasy shynymen tómendep ketkenin kórip, bilip otyr. Biz ortalyq deńgeide de, jergilikti aýqymda da basqarý isinde júielik sipattaǵy qatelikter kóbeigenin túsinip otyrmyz», - dedi Prezident Ákimshiligi Basshysynyń birinshi orynbasary.
Dáýren Abaevtyń sózinshe, jemqorlyq týraly sóz bolǵanda qazir bári jeń ushynan jalǵasqan tamyr-tanystyq, nepotizm, biýrokratiia siiaqty memlekettik apparattyń túrli aqaýlaryn aitatyn bolǵan.
«Al osy problemany qalai sheshý kerek degende adal emes, aqylsyz, bilimi joq adamdardyń ornyna qyzmetke laiyq, adal, aqyldy, bilimi bar adamdardy qoiý kerek degendi jii aitady. Árine, bul ádemi estiledi. Biraq problema basqada. Kez kelgen sheneýnik qalyptasqan núktelerdiń belgilengen júiesinde jumys isteidi. Ony kásibi ekojúie deýge bolady. Bul ekojúie ish pystyratyn dúnielerden quralǵan. Ol – reglamentter, laýazymdyq nusqaýlyqtar, qyzmettik ierarhiianyń erekshelikteri jáne taǵy basqalar. Kóbinese bul parametrler bylai qurylǵan. Sen tipti, Nobel syilyǵynyń úsh márte laýraeaty nemese megakreativti intellektýal bolsań da, erte me, kesh pe, bári bir qaǵaz ben esepterge kómilip otyratyn klassikalyq sheneýnikke, biýrokratqa ainalasyń», - dedi spiker.
Prezident Ákimshiligi basshysynyń orynbasary Qasym-Jomart Toqaevtyń el aýzynda júrgen atalmysh tapsyrmasy memlekettik basqarý júiesiniń parametrlerin ózgertý jolyndaǵy alǵashqy qadamdardyń biri degen oi aitty.
«Memlekettik qyzmetshilerdiń inerttiligi, bastamadan jurdailyǵy, titimdei qatelikti taýdai kórip qorqýy memleketke jemqorlyqtyń ózinen de úlken shyǵyn ákelip jatqan shyǵar. Men muny ádemi sóileý úshin aityp otyrǵanym joq. Qarapaiym ǵana mysal, buryn da aitqanmyn. Byltyr jazda pandemiia órship, jyldam qimyldap, jaýapkershilikti moiynǵa alý arqyly meditsinalyq maskalar men ókpe apparattaryn, dári-dármekterdi der shaǵynda satyp alý kerek bolǵan kezde adamdar joǵarydan nusqaý kútip otyryp aldy. Al myna jaqta adamdar aýa jetpei, tunshyǵyp jatqan edi. Ottegi maskalary, bári-bári keshigip jetti. Óitkeni aktilerge qoldar men buryshtamalar qoiylmaǵan edi. Tek Prezident aralasqannan keiin ǵana protsess qarqyn aldy», - dep eske aldy Dáýren Abaev.
Sondai-aq, ol Prezidenttiń el arasynda qyzý talqylanǵan sóziniń astarynda jemqorlyqpen kúres jumsartylady degen ishara jatpaǵanyn eskertti.
«Senińiz, jemqorlyqpen kúresti eshkim toqtataiyn dep jatqan joq. Kerisinshe buǵan deiin biýrokratiialyq shielenisterdi tarqatýǵa baǵyttalǵan kúshtiń bári shyn jemqorlyqpen kúreske tastalady. Memlekettik qyzmetshiniń áleýetin tolyq ashýǵa jaǵdai jasalyp, tiimdiligin arttyrý kerek. Bul baǵyttaǵy basty jumys osy bolmaq» - dedi ol.
