Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly qýańshylyq pen jut jaǵdaiynda qurbandyq shalý týraly suraqtarǵa jaýap berdi, dep habarlaidy QazAqparat.
«Shopan ata» qoishylar qaýymdastyǵynyń tóraǵasy Almasbek Sadyrbaev qurbandyq shalmaýdy, mal basyn saqtap qalýdy jáne zardap shekken óńirlerge kómektesýdi usynǵan edi. Buǵan ne aitasyz?», - degen suraq qoiyldy Ortalyq kommýnikatsiialar qyzmetindegi baspasóz máslihatynda.
Bas múftidiń aitýynsha, dini basqarmaǵa mundai usynystar birneshe adam tarapynan aitylǵan.
«Degenmen, shariǵat erejelerden, talaptardan turatyny barshamyzǵa belgili. Alla taǵala qasietti Quranda Káýsar súresinde «Alla úshin namaz oqy jáne qurbandyq shal» deidi. Osy aiattaǵy buiryq jaǵdaiy kelgen árbir musylmanǵa qurbandyq shalýdy mindetteidi. Jáne Paiǵambarymyz s.ǵ.s. «Jaǵdaiy kele tura qurbandyq shalmaǵan adamdar bizdiń namaz oqityn ornymyzǵa jaqyndamasyn» deidi. Iaǵni, bul talaptar jaǵdaiy bar adamdarǵa qurbandyq shalýdyń mindet ekenin kórsetip tur», - dep jaýap berdi Naýryzbai qajy Taǵanuly.
Sonymen birge, Bas múfti islam dinindegi kóp merekelerde halyqqa kómek kórsetiletinin atap ótti.
«Qurbandyq malynyń da bir bóligi muqtaj jandarǵa beriledi. Tipti tolyqtai berýge de shariǵatymyz ruqsat etedi. Eger bir kisi qurban shalsa, sol maldyń etin tolyǵymen muqtajdarǵa berińizder dei alady. Biz osy salada kóp jyl jumys istedik jáne kórgen tájiribemizde kóp adamdar qurbandyq ýaqyty jaqyndaǵanda meshitterge kelip, tizimge tirkelip, kómek alady. Qarttar jáne balalar úileri de ózderi habarlasyp, Qurban aitta bir jylǵa jetetin et jinaidy. Olardy tońazytqyshta saqtap, kelesi jylǵa deiin paidalanady. Iaǵni bul jerde kórgenimiz osy qurbandyqtyń ózi qaiyrymdylyq retinde elimizge úlken kómek bolyp keldi», - dedi Naýryzbai qajy Taǵanuly.
QMDB jut bolyp jatqan jerlerde shama-sharqynsha kómek qolyn sozyp jatyr.
«Úkimetten de qarajat bólinip jatyr jáne bul másele sheshiledi dep úmittenemiz. Sondyqtan, usynys jasap jatqandarǵa rahmet, shariǵattyń talap etken sharttaryn múftiler nemese ǵalymdar ózgerte almaidy. Byltyr da, biyl da indet jaǵdaiynda qurbandyq shalýǵa jáne úlestirýge jetilip kele jatyrmyz. Alla taǵala nietimizdi qabyl etsin», - dedi Naýryzbai qajy Taǵanuly.
