Foto: Polisia.kz
IIM jáne UQK vedomstvoaralyq jedel-tergeý toby BAQ ókilderine shabýyldar uiymdastyrý deregi boiynsha qylmystyq isti tergeýdi jalǵastyryp jatyr. Ustalǵan Tokarev óziniń kinásin moiyndaǵan jáne tergeýge kómektesýge kelisken, - dep habarlaidy "Ult aqparat" Polisia.kz basylymyna silteme jasap.
Oǵan basqa shetel azamattary - K.Litvinovtiń, S.Shapovalovtyń, B.Demchenko men Ia.Malyshoktyń belsendi kómek kórsetkeni anyqtaldy.
Tokarevtiń ózi uiymdastyrýshy jáne úilestirýshi retinde, al toptyń basqa qatysýshylary - Litvinov, Shapovalov jáne Demchenko rekrýterler rolin atqaryp, Qazaqstan azamattary arasynan arandatýdy tikelei iske asyrýshylardy, iaǵni "qabandar" dep atalatyn oryndaýshylardy izdeýmen jáne qylmystyq áreketke tartýmen ainalysqan.
Sondai-aq olar ashyq aqparattyq derekkózderden jábirlenýshilerge qatysty málimetterdi jinaǵan. Memlekettik aqparattyq derekterge ruqsaty bar tulǵalardy izdestirgen. Tokarevpen birge arandatýlardy iske asyrý joldaryn (kólikterdi órteý, qaýip tóndirý jáne shabýyldaý) ázirlegen.
Malyshok hakerlik baǵytqa jaýapty bolyp (flýd, DDos, buzý jáne t.b.), "Orda" jáne "Elmedia" saittaryna DDos-shabýyldaryn ózi uiymdastyrǵan. "Ulysmedia" redaktsiiasynyń saityn buzǵan.
Qazirgi tańda Bas prokýratýramen birge Tokarevtiń sybailastaryn halyqaralyq izdeýge jariialaý máselesi pysyqtalýda. Bastamashyldardy anyqtaý boiynsha jumystar júrip jatyr, nátijeleri qosymsha habarlanady.
Eske salaiyq, buǵan deiin tanymal qazaqstandyq jýrnalister men redaktsiialarǵa jasalǵan shabýyldy uiymdastyrǵan adam ustalǵany habarlanǵan bolatyn. Almatyda arandatýshylyq shabýyldardyń tikelei úilestirýshisi - sheteldik azamat, bilikti haker O.Tokarev ustaldy. Onyń ýaqytsha turyp jatqan jerinen shabýyldardy basqarý, anonimdi Telegram-akkaýnttarda "tapsyrystar" berý, oryndaýshylardy tabý jáne olardyń aktsiialaryna aqy tóleý júrgizilgen tehnika tabylyp, tárkilendi.
Bul top Vadim Boreikoǵa, Gúlnara Bajkenovaǵa, G.Erǵalievaǵa, Samal Ibraevaǵa jáne buqaralyq aqparat quraldarynyń basqa da ókilderine qarsy 30-dan astam arandatýshylyq shabýyl jasaǵan.
